Станіслаў Бялкоўскі: Пуцін не любіць Лукашэнку

Прэзідэнт РФ не жадае Лукашэнку пралангацыі паўнамоцтваў.

Рэжым Лукашэнкі, супраць якога ў краіне працягваюцца пратэсты, набліжаецца да канца. Такое меркаванне расейскі палітолаг Станіслаў Бялкоўскі выказаў 31 кастрычніка ў эфіры радыёстанцыі "Эхо Москвы".

"Аляксандр Рыгоравіч цісне ўсё мацней. Пагроза адарваць рукі кожнаму беларусу, хто будзе неляяльны да сілавікоў. Ён нават памяняў міністра ўнутраных спраў, бо стары міністр, мабыць, ужо недастаткова надзейны. Гэта нармальны паранаідальны стан дыктатара, напрыканцы свайго рэжыму. Ужо неўзабаве ён, я думаю, пачне сапраўдны пагром сілавікоў, бо вельмі мала хто ў яго разуменні застанецца верны яму па-сапраўднаму і гатовы ісці да канца", - сказаў ён.

Са слоў палітолага, Лукашэнка "прызначыў гаўляйтэраў у рэгіёны, якія павінны душыць любыя праявы нязгоды з ім".

"Увогуле, ён цалкам пераходзіць на рэжым кіравання ў духу лацінаамерыканскай хунты, пераканаўшыся ў тым, што народ Беларусі яго ўсё адно не падтрымлівае, нягледзячы ні на што. Больш ніякіх канструктыўных дзеянняў ён не прапануе, і дарма", - адзначыў Бялкоўскі.

Ён думае, што Лукашэнка Беларусі разлічваў на дапамогу з боку прэзідэнта РФ Уладзіміра Пуціна.

"Пуцін не любіць Лукашэнку і не жадае яму пралангацыі паўнамоцтваў, што б публічна ні заяўлялася і ні абвяшчалася", - патлумачыў Бялкоўскі.