Навукоўцы ў Ганконгу ацанілі магчымую колькасць хворых на каранавірус ва Ухані
11- 1.02.2020, 19:00
- 28,398
Лічбы не супадаюць з заявамі кітайскіх улад.
Навукоўцы Універсітэта Ганконга паспрабавалі змадэляваць працэс распаўсюджвання "уханьскага" каранавіруса і выказалі меркаванне, што ў адным толькі горадзе Ухані заразіцца маглі 75 тысяч 815 чалавек, паведамляе interfax.ru.
Як паведамляе South China Morning Post са спасылкай на звесткі даследавання, апублікаванага ў медыцынскім часопісе The Lancet, такую лічбу даследчыкі атрымалі, грунтуючыся на тым, што кожны хворы мог заразіць у сярэднім 2,68 чалавека.
Між тым, нагадвае выданне, колькасць новых пацверджаных выпадкаў заражэння ўсталявала чарговы дзённы рэкорд. Колькасць заражаных павялічылася ў краіне на 2 тысячы 21 чалавека, смяротнасць - на 46 чалавек.
Колькасць хворых на пнеўманію, выкліканую новым тыпам каранавіруса, склала 11 тысяч 791 чалавек, смяротны вынік зафіксаваны ў 259 выпадках.
Як паведамляе SCMP, у суботу, 1 лютага, места Хуанган з насельніцтвам 7,4 мільёна чалавек стала першым, дзе жыхарам катэгарычна забаронена пакідаць дамы. Толькі адзін сямейнік можа выйсці адзін раз на дзень для куплі патрэбных прадуктаў і тавараў.
Выданне адзначае, што праз нястачу найважнейшых тавараў улады краіны гатовыя часткова адмовіцца ад вайны тарыфаў з ЗША, хаця б у тым, што тычыцца імпарту ахоўных сродкаў.