Як беларусаў правяраюць на мяжы

Словы пра тое, што ўсё ў парадку - не больш, чым гучныя заявы.

Мянчук напісаў Telegram-каналу «Баста!» пра тое, як арганізаваная праверка для беларусаў, якія вяртаюцца дадому з-за мяжы:

- Сёння ўначы вярнуўся са Славаччыны на аўтамабілі. На ўездзе на тэрыторыю Беларусі на памежным пераходзе Дамачава ў мяне спыталі, ці не быў я ў Італіі. Я сказаў, што не - паверылі на слова. Пры пашпартным кантролі і праверцы аўтамабіля спыталі, як я сябе адчуваю, ці няма прастудных захворванняў і высокай тэмпературы. Адказаў, што градусніка ў мяне няма, каб яе вымераць. Памежнік сказаў, што я б адчуў, калі б была высокая. Тэмпературу ніхто не вымяраў, абследаванне не праводзілі і нас без пытанняў упусцілі ў краіну.

Мы адчуваем сябе нармальна, але па прыездзе ў Менск наважылі здаць аналізы. Патэлефанавалі на Крапоткіна, дзе ў нас удакладнілі, адкуль мы прыехалі і сказалі, што добраахвотна іх не прымуць, толькі праз «хуткую». Парэкамендавалі звярнуцца ў паліклініку па месцы жыхарства.

Гэта, у сваю чаргу, вядомыя ўстановы, але мы ўсё ж датэлефанаваліся да раённай. Пачуўшы пытанне, накіравалі нас назад на Крапоткіна.

Я, уласна, і меркаваў, што кола замкнецца.

З гэтай сітуацыі раблю выснову, што ў нас далёка не ўсё пад кантролем, як запэўніваюць Міністэрства аховы здароўя і ўлады. Словы пра тое, што ўсё ў парадку - не больш, чым гучныя заявы.