Колькасць хворых на COVID-19 у свеце дасягнула 2,3 мільёна

САЗ заявіла пра адсутнасць сведчанняў таго, што ў тых, хто перахварэў развіваецца імунітэт да каранавірусу.

Колькасць інфікаваных каранавірусам ва ўсім свеце вырасла да 2,3 мільёна. Колькасць новых выпадкаў захворвання ў ЗША няўхільна расце, але некалькі іншых краін паведамляюць аб зніжэнні гэтага паказчыка, паведамляе «Голас Амерыкі».

Рэсурсны цэнтр Універсітэта Джонса Гопкінса наконт каранавірусу паведаміў, што ў ЗША зарэгістравана больш 735 тысяч хворых, блізу 40 тысяч чалавек памерлі. Краіна стала эпіцэнтрам пандэміі, якая пачалася ў Кітаі ў канцы мінулага года.

Кітай у нядзелю паведаміў аб 16 новых выпадках.

Паўднёвая Карэя, дзе адбылася адна з першых буйных успышак за межамі Кітая, паведаміла толькі пра восем новых выпадкаў інфікавання - упершыню за некалькі месяцаў гэты паказчык стаў адназначным лікам.

САЗ заявіла ў нядзелю, што «няма сведчанняў», што людзі, якія перанеслі COVID-19, сталі неўспрымальныя да віруса, што разбурыла надзеі на стварэнне тэсту на антыцелы да гэтага каранавірусу.

Карэйскі цэнтр кантролю і прафілактыкі захворванняў паведаміў, што 163 чалавекі, у якіх быў каранавірус, інфікаваліся паўторна.

На фоне глабальнай пандэміі спявачка Лэдзі Гага арганізавала двухгадзінны віртуальны канцэрт «Адзіны свет: разам дома», у якім узялі ўдзел самыя розныя знакамітасці, якія выступілі з пасланнем надзеі.

Гурт Rolling Stones, Стыві Уандэр, спявачка Ліза, тэлевядоўца Опра Уінфры і Стывен Кольбер былі сярод папулярных фігур, якія ўзялі ўдзел у сусветнай тэлепраграме ў суботу, прысвечанай медыцынскім работнікам, якія змагаюцца з інфекцыяй, часцяком з вялікай рызыкай для жыцця.

Зорка індыйскага кіно Шахрух Хан, кітайскі піяніст Лан Лан і нігерыйскі спявак Бурна Бой таксама ўвайшлі ў лік удзельнікаў канцэрту з усяго свету.

Імпрэза была спланаваная некамерцыйнай арганізацыяй Global Citizen («Грамадзянін свету») і САЗ.

Тым часам група з 13 краін заклікала да глабальнага супрацоўніцтва для змякчэння эканамічных наступстваў каранавіруснай пандэміі, паколькі колькасць інфікавання і смяротных зыходаў працягвае расці ва ўсім свеце.

У супольнай заяве гэтых краін, куды ўвайшлі Вялікабрытанія, Інданезія, Нямеччына, Сінгапур, Турцыя і Канада, гаворыцца: «Вельмі важна, каб мы супрацоўнічалі дзеля выратавання жыццяў людзей і іх сродкаў да існавання».

Група, якая таксама ўключае Італію, Бразілію, Францыю, Мексіку, Паўднёвую Карэю, Марока і Перу, паабяцала «працаваць з усімі краінамі для каардынацыі захадаў у галіне аховы здароўя, падарожжаў, гандлю, эканомікі і фінансаў, каб звесці збоі да мінімуму і аднавіцца, стаўшы мацнейшымі».

Эканамічная камісія ААН для Афрыкі заявіла, што пандэмія можа забраць жыцці 300 тысяч жыхароў кантынента да канца года. Паводле ацэнак САЗ, на сотні мільёнаў жыхароў 41 краіны Афрыкі прыходзіцца менш за 2 тысячы апаратаў ШВЛ, і гэта ўзмацняе асцярогі, што хранічны дэфіцыт гэтага абсталявання і іншых важных матэрыялаў можа мець катастрафічныя наступствы.