Пасол Беларусі ў Славаччыне падтрымаў страйк і пратэсты
40- 16.08.2020, 8:25
- 54,873
Ігар Ляшчэня запісаў відэазварот.
Пасол Беларусі ў Славаччыне і былы памочнік Лукашэнкі Ігар Ляшчэня запісаў відэазварот, у якім падтрымаў страйкоўцаў і грамадзян краіны, якія выходзяць на пратэсты. Тэкст звароту апублікаваў тэлеграм-канал «Наша Ніва»:
- Мяне клічуць Ігар Аляксандравіч Ляшчэня.
Я звяртаюся да вас не толькі як Пасол Беларусі ў Славаччыне.
Я звяртаюся да вас у якасці старэйшага кіраўніка беларускай замежныя ўстановы па досведу работы Паслом і адзінага дзейнага беларускага дыпламата, які працаваў у МЗС СССР і ў савецкім пасольстве за мяжой.
Як і ўсе беларусы, я - у шоку ад гісторый аб катаваннях і збіцці грамадзян маёй краіны. На ТУТ.бай ў адной з фатаграфій месіва з сінякоў і крывападцёкаў мы апазналі аднакласніка маёй дачкі, які нібыта ніколі не ўважаўся за бунтаўшчыка!
На жаль, для гэтага былі перадумовы.
15 гадоў таму ў нас была адкрытая «Лінія Сталіна». І гаворка ішла не толькі пра подзвіг савецкага народа. Не менш важная прычына - імя Сталіна ў назве. Затым з'явіўся міністр унутраных спраў, якому форма афіцэра сталінскага НКВД нагадвала не пра крывавы 1937 год і не пра ГУЛАГу, а пра Дзень Перамогі. А цяпер сотні маіх суайчыннікаў адчулі на сабе, што шэраг прадстаўнікоў праваахоўных органаў цалкам адрадзілі традыцыі НКВД у талерантнай еўрапейскай Беларусі 21 стагоддзя!
МЗС, прадстаўнікі якога абараняюць інтарэсы Беларусі за мяжой, часта прыраўноўваюць да сілавых структур. Сілавікі імкнуцца не дапусціць умяшання ва ўнутраныя справы краіны звонку.
Але я дакладна ведаю, што ключавымі складнікамі згуртаванай, моцнай і не схільнай да замежнага ўплыву дзяржавы з'яўляюцца павага волі народа, ягонай мовы, гісторыі і культуры.
У Славаччыне я прадстаўляю Беларусь і беларускі народ, які ў адпаведнасці з Канстытуцыяй з'яўляецца адзінай крыніцай улады ў нашай краіне.
Я салідарны з тымі, хто выйшаў на вуліцы беларускіх гарадоў з мірнымі шэсцямі, каб іх голас быў пачуты. Як ураджэнец горада Жодзіна я - з вамі рабочыя «БелАЗа» і «Кавальскага завода цяжкіх штамповак»!
Я шчыра спадзяюся, што будучыня маёй краіны будзе заснаваная на ўліку пазіцый усіх слаёў грамадства і прадстаўнікоў розных палітычных сілаў.
Беларусы выпакутавалі гэта права!