Дзейны афіцэр міліцыі расказаў, як карнікі рыхтавалі збіццё людзей

Прызнанне падпалкоўніка з Ліды.

«Ідэалагічная падрыхтоўка была такая: калі дзейная ўлада саступае, то кожнага з нас [супрацоўнікаў міліцыі] будуць вешаць на суках пры дарозе. Таму абараняць гэтую ўладу трэба ўсімі сродкамі і спосабамі». Tut.by прыводзіць аповед пра падзеі апошніх месяцаў дзейнага падпалкоўніка міліцыі з Ліды, камандзіра роты ППС Лідскага РАУС Юрыя Махнача.

Яшчэ ў чэрвені Юрыю Іванавічу ад намеснік начальніка Лідскага РАУС Дзяніса Аўраменкава паступіў загад разганяць мірны пікет у Лідзе. Туды выйшлі, са слоў Махнача, мірныя людзі - пенсіянеры, мужчыны, жанчыны, з дзецьмі і вазкамі, якія нічога дрэннага не рабілі. Ён адмовіўся выконваць загад начальства, які, у сваю чаргу, паступіў таму ад намеснік начальніка УУС Гарадзенскага аблвыканкама Аляксандра Шастайлы.

У перыяд перадвыбарчай кампаніі пачалася «рэальная падрыхтоўка да вайны супраць свайго народа органаў унутраных спраў».

«Ідэалогія была такая: калі дзейная ўлада саступае, то кожнага з нас будуць вешаць на суках пры дарозе. Таму гэтую ўладу трэба абараняць усімі сродкамі і спосабамі».

«У Лідзе адбываліся страшныя рэчы: збіванні людзей на тэрыторыі РАУС, збіццё і катаванні ў аўтазаках, на мыйцы аўтатранспарту РАУС». Юрый Іванавіч кажа, што гэта рабілі супрацоўнікі АМАПу Гарадзенскага аблвыканкама і супрацоўнікі Лідскага РАУС. У той момант сам ён быў у адпачынку - бо яшчэ перад выбарамі зразумеў, што не можа хадзіць на працу.

У Лідскім РАУС 13 афіцэраў не пагадзіліся са збіццём і катаваннямі людзей і «з паднятай галавой» падалі рапарты аб звальненні. Яны гатовыя даваць паказанні аб фактах супрацьпраўных дзеянняў на тэрыторыі Лідскага РАУС.

«Гэта выступ зыходзіць асабіста ад мяне, мне ніхто не праплаціў, як цяпер модна казаць. Гэта крык душы. З гэтым мірыцца нельга. Такое стаўленне да свайго народу недапушчальнае».

Ягоных апалітычных сяброў і знаёмых таксама забіралі ў тапачках ад дома - і пасля затрымання яны былі ўсе сінія.

«23 найлепшыя гады жыцця я аддаў службе - і ніколі не мог падумаць, што так павернецца. Што мы пачнём ставіцца па-зверску і па-быдлячы да людзей сваёй краіны. Мне сорамна насіць пагоны».

Раней у інтэрв'ю мясцовай газеце Юрый Іванавіч распавядаў, што «з выбарам прафесіі вызначыўся падчас службы ў войску, а сітуацыя, калі яшчэ ў пачатку маёй кар'еры ахвярай злачынцаў стаў блізкі мне чалавек, яшчэ раз пацвердзіла: раскрываць злачынствы, «чысціць» горад ад нядобрых людзей - гэта тое, чым я хачу займацца».

Больш у такой міліцыі ён і некаторыя ягоныя калегі працаваць не хочуць.

Заўтра, 18 жніўня, Юрый Іванавіч павінен выйсці на працу, каб падаць рапарт аб звальненні. Журналісты будуць сачыць за лёсам Юрыя Іванавіча Махнача і ягоных калег.

На мінулым тыдні ў Лідзе, як і ў іншых гарадах, адбываліся масавыя жорсткія затрыманні. Як распавядаюць мясцовыя жыхары, было затрымана прыкладна 300 чалавек, некаторыя былі моцна збітыя.