Оксфардскі ўніверсітэт аднавіў выпрабаванні вакцыны ад каранавіруса

Клінічныя выпрабаванні былі перапыненыя праз хваробу аднаго з удзельнікаў даследавання.

Оксфардскі ўніверсітэт і фармацэўтычная кампанія AstraZeneca аднавілі клінічныя выпрабаванні вакцыны ад Covid-19, перарваныя на гэтым тыдні праз хваробу аднаго з удзельнікаў даследавання, паведамляе ВВС.

У аўторак распрацоўшчыкі вакцыны паведамілі, што клінічныя выпрабаванні прыпыненыя праз «патэнцыйна невытлумачальнае захворванне», выяўленае ў аднаго з добраахвотнікаў.

Аднак зараз Оксфардскі ўніверсітэт і AstraZeneca кажуць, што незалежныя органы, якія адказваюць за бяспеку даследавання, разгледзелі гэты выпадак і наважылі, што вакцынацыя валанцёраў можа быць працягнутая.

«Падчас падобных маштабных выпрабаванняў некаторыя ўдзельнікі могуць захварэць - і кожны такі выпадак неабходна старанна ацэньваць, каб адсачыць поўнае выкананне мер бяспекі, - гаворыцца ў паведамленні Оксфардскага ўніверсітэта. - Незалежны працэс ацэнкі завершаны - і ў адпаведнасці з рэкамендацыямі незалежнай камісіі бяспекі і брытанскага рэгулятара... выпрабаванні ў Вялікабрытаніі будуць працягнутыя».

Пра тое, чым менавіта захварэў ўдзельнік даследавання, афіцыйна не паведамляецца.

Аднак паводле звестак New York Times, у пацыента быў знойдзены папярочны міэліт - даволі рэдкае запаленчае захворванне спіннога мозгу, якое часта выклікаюць вірусныя інфекцыі. Раней журналісты паведамлялі са спасылкай на лекараў, што гэты ўдзельнік даследаванняў павінен ачуняць.

«Галоўнае - бяспека»

Як перадае Франс-прэс, 31 жніўня AstraZeneca пачала набіраць для ўдзелу ў клінічных выпрабаваннях 30 тысяч добраахвотнікаў у ЗША, не гэткія шматлікія групы валанцёраў пачалі атрымліваць прэпарат у Вялікабрытаніі, Бразіліі і Паўднёвай Афрыцы. Плануецца таксама правесці выпрабаванні ў Расеі і Японіі.

Навукоўцы з Кембрыджскага ўніверсітэта Шарлот Самэрс сказала Франс-прэс, што навукоўцы з Оксфарда прадэманстравалі жаданне «зрабіць бяспеку галоўнай у сваёй праграме даследаванняў».

«Каб пераадолець пандэмію Covid-19, нам неабходна распрацаваць вакцыны і тэрапіі, якія людзі будуць лічыць бяспечнымі для выкарыстання. Таму вельмі важна захоўваць веру грамадства ў тое, што мы кіруемся толькі навуковымі сведчаннямі і не робім вывадаў да таго, як атрымаем інфармацыю», - кажа экспэрт.

Распрацоўка вакцыны ад каранавіруса вядзецца ў многіх краінах. Як нядаўна паведаміла Сусветная арганізацыя аховы здароўя, зараз праходзяць выпрабаванні амаль 180 варыянтаў вакцыны.

Калі будзе вакцына?

На гэтым тыдні дзевяць найбуйнейшых фармацэўтычных кампаній свету, у тым ліку AstraZeneca, падпісалі сумеснае абяцанне не спяшацца з выпускам вакцыны, але забяспечыць правядзенне ўсіх неабходных працэдур, каб зрабіць яе бяспечнай. Разам гэтыя фірмы распрацавалі больш за 70 вакцын ад Covid-19.

СААЗ уважае, што нават калі вакцына будзе паспяхова распрацаваная, яна павінна будзе цалкам прайсці тэставанне і наўрад ці будзе адобрана сёлета.

Вакцына Оксфардскага ўніверсітэта і AstraZeneca - у ліку найбольш перспектыўных, яна паспяхова прайшла дзве стадыі клінічных выпрабаванняў з трох. Пра намер вырабляць гэты прэпарат у ліпені таксама заяўляла расейская кампанія Р-фарм.

AstraZeneca абяцае вырабіць блізу трох мільярдаў доз сваёй вакцыны ва ўсім свеце - гэта найбольш амбіцыйны план сярод усіх фармацэўтычных кампаній.

На завяршальнай стадыі выпрабаванняў таксама знаходзяцца дзве іншыя вакцыны ў ЗША: адну з іх вырабляе кампанія Moderna, а другую распрацоўваюць Pfizer сумесна з нямецкай BioNTech.

Некаторыя палітычныя фігуры, у тым ліку прэзідэнт ЗША Дональд Трамп, абяцаюць, што вакцына будзе гатова да ўжывання ў найбліжэйшыя месяцы.

Як паведамляе Франс-прэс, AstraZeneca спадзяецца, што вакцына можа быць гатовая «да канца гэтага года або да пачатку наступнага». Аднак Оксфардскі ўніверсітэт не выключае, што прэпарат не будзе выкарыстоўвацца да 2022 года.