Мэркель: Фінальная пастанова што да «Паўночнага струменю - 2» будзе еўрапейскай, а не нямецкай
11- 8.09.2020, 18:58
- 19,520
Канцлерка ФРГ узгадняе з еўрапейскімі партнёрамі санкцыі за атручванне Навальнага.
Канцлерка ФРГ Ангела Мэркель мяркуе, што ўсякі адказ Маскве на інцыдэнт з апазіцыянерам Аляксеем Навальным неабходна ўзгадніць з еўрапейскімі партнёрамі, ён не павінен быць аднабаковым нямецкім, паведамляе ў аўторак Bloomberg са спасылкай на чыноўніка з партыі «Хрысціянска-дэмакратычны саюз», цытуе interfax.by.
З ягоных слоў, Мэркель пакуль не прыняла канчатковай пастановы, ці будуць дзеянні ў дачыненні да Масквы ў гэтай сувязі закранаць праект «Паўночны струмень – 2».
«Ён адзначыў, што Мэркель не прыняла фінальнайпастановы наконт таго, ці можа рэакцыя ў дачыненні да Масквы (у сувязі з інцыдэнтам з Навальным - ІФ) закрануць «Паўночны струмень – 2», - піша агенцтва.
Напярэдадні прадстаўнік Кабміна ФРГ Штэфан Зайберт заявіў, што на пытанні аб заканчэнні будаўніцтва «Паўночнага струменю – 2» у сувязі са справай аб атручэнні расейскага апазіцыянера Аляксея Навальнага адказваць пакуль зарана. Са слоў Зайберт, пытанне рэакцыі на тое, што адбылося з Навальным, патрабуе кансультацый з еўрапейскімі партнёрамі ФРГ.
Навальнаму стала дрэнна 20 жніўня ў палёце з Томска ў Маскву. Самалёт здзейсніў экстраную пасадку ў аэрапорце Омска. Апазіцыянер быў шпіталізаваны ў коме ў рэанімацыю омскай лякарні. 22 жніўня яго перавезлі на лячэнне ў Нямеччыну ў берлінскую клініку Charite.
2 верасня ўлады ФРГ са спасылкай на лабараторыю бундэсвера абвясцілі аб тым, што ў арганізме Навальнага выяўленыя сляды атруты з групы «Навічок», аб якім упершыню стала вядома пасля атручвання ў Вялікай Брытаніі экс-супрацоўніка ГРУ Сяргея Скрыпаля і ягонай дачкі Юліі ў сакавіку 2018 года. Адказнасць за замах на Скрыпалёў брытанскія ўлады ўсклалі на Расею. У Маскве адпрэчваюць гэтыя абвінавачванні.
Канцлерка ФРГ Ангела Мэркель заклікала расейскі ўрад даць тлумачэнні аб сітуацыі з Навальным. На яе думку, апазіцыянер стаў ахвярай злачынства, а атрута з групы «Навічок» у ягоным арганізме вызначаная дакладна.