«Пераклічка» дармаедаў, рост тарыфаў, падаражанне абутку: што зменіцца ў Беларусі з лістапада
2- 26.10.2021, 12:07
- 6,736
Новаўвядзенні, якія адаб'юцца на таўшчыні партманэтаў.
З 1 лістапада падаражэюць паслугі мабільных аператараў і "Белтэлекама". У наступным месяцы павінны абнавіць базу дармаедаў. Да 15 лістапада трэба паспець заплаціць зямельны падатак і на нерухомасць, інакш пагражае штраф. У наступным месяцы для будаўнікоў перагледзяць аплату за працу. З 1 лістапада таксама павінны перагледзець сумы мінімальных працоўных і сацыяльных пенсій, а таксама некаторыя дапамогі на дзяцей і бюджэт пражытковага мінімуму. У наступным месяцы таксама можа падаражэць некаторы абутак.
Сайт zerkalo.io склаў падборку лістападаўскіх змен, якія могуць адбіцца на таўшчыні нашых партманэтаў.
Абновяць базу дармаедаў
У лістападзе абновяць спіс працаздольнага насельніцтва, якое не занята ў эканоміцы. Тым, хто патрапіць у яго і ў каго ёсць ва ўласнасці жыллё, давядзецца аплачваць поўнымі тарыфамі гарачае водазабеспячэнне.
Нагадаем, першыя спісы незанятых у эканоміцы сфармавалі да 1 лютага 2019 года. Пасля гэтага іх штоквартальна абнаўляюць. Дакументы, якія пацвярджаюць працу або навучанне за мяжой, трэба падаць у камісію для каардынацыі работы ў садзейнічанні занятасці да 21 кастрычніка, 21 студзеня, 21 красавіка і 21 ліпеня адпаведна.
Паспець заплаціць зямельны падатак і за нерухомасць
Да 15 лістапада трэба паспець заплаціць зямельны падатак і на нерухомую маёмасць. Тым, хто не заплаціць зборы своечасова, пагражае штраф.
Сумы падаткаў, якія не былі выплачаныя ў бюджэт добраахвотна, спаганяюцца праз суд з налічэннем штрафу за кожны каляндарны дзень пратэрміноўкі. За нявыплату або няпоўную выплату накладаецца штраф сумай 15% ад нявыплачанай сумы падатку, але не менш як 0,5 базавай велічыні (14,5 рублёў).
Можа падаражэць некаторы абутак
З 1 лістапада ў Беларусі будуць маркаваць абутак, гэта значыць наносіць на яго спецыяльныя знакі. «Рэалізацыя рэшткаў абутку пасля 1 лістапада дазваляецца толькі пасля яе маркіроўкі. Рэшткі абутковых тавараў павінны быць прамаркіраваныя да 1 сакавіка 2022 года», - удакладняюць у Міністэрстве падаткаў і збораў.
Як тлумачаць удзельнікі рынку, з-за гэтага новаўвядзення можа падаражэць некаторы абутак. Кошты вырастуць, як чакаецца, у дробных гандляроў і ІП. Гэта звязана з затратамі на маркіроўку.
Падаражэе мабільная сувязь і інтэрнэт-паслугі
Кампанія МТС падвысіць з 1 лістапада некаторыя тарыфы на свае паслугі. Раней падаражанне анансавалі на 1 кастрычніка для фізічных і юрыдычных асоб у сярэднім на 4 адсоткі, але ў выніку перанеслі на лістапад.
З 1 лістапада "Белтэлекам" павысіць тарыфы на некаторыя паслугі доступу ў Інтэрнет. Да гэтага паведамлялася, што іх паднімуць з 1 кастрычніка: рост павінен скласці ў сярэднім 4%. Перанос зрабілі "на ўзгадненне з рэгулятарам".
Кампанія А1 таксама падвысіць некаторыя тарыфы на паслугі сувязі (першапачаткова планавалі падняць з 1 кастрычніка, але потым перанеслі).
У планах уладаў, мабільная сувязь, Інтэрнэт, стацыянарная тэлефонная сувязь, паштовыя паслугі павінны падаражэць на 4% у чацвёртым квартале. Гэта прадугледжана для кампенсацыі росту затрат, але не вышэй за ўзровень прагназаванай базавай інфляцыі.
Перагледзяць некаторыя дапамогі на дзяцей і пенсіі
З 1 лістапада перагледзяць бюджэт пражытачнага мінімуму. Цяпер ён складае 283,46 рубля. Яго альбо павялічаць, альбо пакінуць на ранейшым узроўні. Прапарцыйна росту БПМ мяняюцца і сумы некаторых дапамог, якія даюцца пры нараджэнні дзяцей. Новая сума БПМ будзе дзейнічаць да канца студзеня наступнага года.
Аднаразовая дапамога жанчынам, якія сталі на ўлік у дзяржаўных арганізацыях аховы здароўя да 12-тыднёвага тэрміну цяжарнасці, таксама павінны перагледзець.
З наступнага месяца таксама павінны перагледзець мінімальныя працоўныя і сацыяльныя пенсіі, якія прывязаны да сумы бюджэту пражытачнага мінімуму. Напрыклад, сацыяльная пенсія з прычыну ўзросту зараз складае 141,73 рубля, а мінімальная пенсія паводле ўзросту (без уліку даплаты 20% ад сярэдняга заробку) — 70,87 рублёў.
Запусцяць новы рэйс з Расеі
Расейская авіякампанія Nordwind Airlines плануе ў лістападзе запусціць рэйсы з Масквы ў Гомель. Палёты, мяркуючы з сайта кампаніі, будуць ажыццяўляць тройчы на тыдзень - па панядзелках, серадах і суботах. Першы вылет мусіць адбыцца 10 лістапада.