Беларускія журналісткі атрымалі Лейпцыгскую прэмію за свабоду СМІ

У Лейпцыгу завочна ўручылі прэмію Кацярыне Андрэевай і Дар'і Чульцовай.

У Нямеччыне адбылася цырымонія ўручэння Лейпцыгскай прэміі за свабоду СМІ. Адну з прэстыжных нямецкіх узнагарод у галіне сродкаў масавай інфармацыі завочна атрымалі ў пятніцу, 8 кастрычніка, беларускія журналісткі Кацярына Бахвалава, якая працавала пад псеўданімам Кацярына Андрэева і Дар'я Чульцова, цяпер адбываюць зняволенне ў калоніі, паведамляе https://www.dw.com/ru/prigovorennye-k-kolonii-zhurnalistki-belsat-poluchili-lejpcigskuju-premiju-za-svobodu-smi/a-59447047>DW.

Супрацоўніцы тэлеканала «Белсат» сваёй працай «далі магчымасць пачуць голас свабоднай журналістыкі ў аўтакратычным рэжыме», гаворыцца ў заяве Фонду ў справах СМІ ашчаднай касы Лейпцыга. За сваю працу 27-гадовая Бахвалава і 24-гадовая Чульцова «вымушаныя пакутаваць ад рэпрэсій рэжыму, як і многія іншыя» беларусы, паказваецца далей. Фонд настойліва заклікаў улады Беларусі вызваліць журналістак.

Як адзначаецца ў заяве, узнагарода з'яўляецца «знакам падбадзёрвання ўсім супрацоўнікам СМІ, а таксама дзеячам грамадзянскай супольнасці - не толькі ў Беларусі». Грашовая частка прэмія складае 10 тысяч еўраў кожнаму лаўрэату.

Лейпцыгская прэмія за свабоду СМІ

Лейпцыгскую прэмію за свабоду СМІ прысуджаюць штогод з 2001 года і ўручаюць вечарам 8 кастрычніка - напярэдадні гадавіны вырашальнай дэманстрацыі супраць рэжыму ГДР, што адбылася 9 кастрычніка 1989 года. Узнагароду прысуджаюць супрацоўнікам СМІ, якія сваёй працай прыкладаюць асаблівыя намаганні для свабоды і будучыні журналістыкі.

Кацярына Андрэева і Дар'я Чульцова былі затрыманыя 15 лістапада 2020 года падчас жывой трансляцыі з акцыі памяці загінулага беларускага актывіста Рамана Бандарэнкі. Паводле версіі следства, праз стрым, які журналісткі вялі з аднаго з суседніх вышынных будынкаў, быў спынены рух 13 аўтобусных маршрутаў, трох тралейбусных і трох трамвайных. Шкоду ДП «Менсктранс» ацанілі ў 11 562,14 рубля (амаль 3675 еўраў у пераліку). Журналістак прысудзілі да двух гадоў пазбаўлення волі на абвінавачванне ў «арганізацыі і падрыхтоўцы дзеянняў, што груба парушаюць грамадскі парадак, альбо актыўным удзеле ў іх».