Прышчэпка ад каранавіруса - кожныя паўгода?

Новыя звесткі навукоўцаў.

Так званыя бустэрныя прышчэпкі ад каранавіруса ўважаюцца сёння за патрэбныя, бо з часам колькасць антыцелаў у крыві вакцынаванага чалавека змяншаецца, піша dw.com.

У выпадку з мРНК-вакцынамі, да якіх належаць, напрыклад, BioNTech/Pfizer і Moderna, гэта адбываецца, як правіла, праз паўгода пасля поўнай імунізацыі. Пасля выкарыстання іншых вакцын, якія патрабавалі толькі адной прышчэпкі, напрыклад Johnson\u0026 Johnson, нямецкая Пастаянная камісія вакцынацыі (Stiko) рэкамендуе рабіць бустэрную прышчэпку яшчэ раней.

Бустэрная прышчэпка: колькі разоў яе рабіць

Але ці азначае гэта, што цяпер мы будзем змушаныя кожныя паўгода ці кожную восень рабіць бустэрныя прышчэпкі, як, напрыклад, ад грыпу? Пакуль адказу на гэтае пытанне медыкі не ведаюць, бо чалавецтва не мае адпаведнага досведу. Бо каранавірус - новы выклік чалавецтву.

У прынцыпе, цалкам магчыма, што цяперашнія вакцыны ад каранавіруса ў будучыні павінны быць зменены пэўным чынам, каб эфектыўна змагацца з новымі варыянтамі віруса, як гэта адбываецца ў выпадку з сезоннымі прышчэпкамі ад грыпу. Ужо цяпер распрацоўваюцца шматлікія новыя вакцыны, якія павінны быць эфектыўныя і супраць дэльта-варыянту каранавіруса.

Пры гэтым вызначальную ролю будзе адыгрываць сам ход пандэміі. Невядома, ці скончыцца яна пасля чацвёртай ці пятай хвалі або каранавірус з усімі яго варыянтамі стане эндэмічным і нам давядзецца змагацца з ім дзесяцігоддзямі. Шчыльна з гэтым звязана пытанне калектыўнага імунітэту. Ці хутка нам удасца яго дасягнуць? Ці будзе ён сфармаваны з прычыны вакцынацыі або ў выніку таго, што ўсе перахварэюць, як гэта адбываецца ў многіх краінах Афрыкі? Мяркуючы з цяперашняй колькасці заражэнняў каранавірусам, гэта можа адбыцца і ў Еўропе.

Якую ролю адыгрываюць Т-клеткі?

Але не толькі антыцелы трэба мець на ўвазе, кажучы аб імунітэце. Гэта паказвае даследаванне, якое праводзілася навукоўцамі з Вялікабрытаніі і Сінгапура, вынікі якога былі апублікаваны ў пачатку лістапада ў спецыялізаваным часопісе Nature, але пакуль не былі рэцэнзаваны і пацверджаны.

Даследнікі знайшлі 58 супрацоўнікаў сістэмы аховы здароўя, у якіх была высокая рызыка заражэння ковідам, але пры гэтым яны ні разу відавочна не хварэлі ковідам і ні адзін ПЦР-тэст у іх не быў дадатным. Сералагічныя тэст на антыцелы ва ўсіх 58 чалавек таксама не выявіў наяўнасць інфекцыі. Навукоўцы выявілі, што гэтая група людзей – так званых "серанегатыўных" – мае больш мультыспецыфічных Т-клетак памяці.

Т-клеткі дзейнічаюць супраць рэплікацыйна-транскрыпцыйнага комплексу (RTC), які ў канчатковым выніку адказвае за размнажэнне віруса. Адначасова ў гэтых 58 чалавек быў выяўлены падвышаны лік пратэіну IFl27, які паказвае на вельмі раннюю інфекцыю каранавірусам. З гэтага навукоўцы робяць выснову, што 58 чалавек перанеслі абартыўную, перапыненую інфекцыю. Магчыма, у гэтым выпадку менавіта Т-клеткі спрыялі таму, што каранавірус быў пераадолены ўжо на ранняй стадыі.

Не зразумела, адкуль у гэтых 58 чалавек такі нязвыкла высокі ўзровень Т-клетак. Магчыма, ён з'явіўся шляхам перанесенай ранняй інфекцыі, выкліканай іншым каранавірусам, магчыма вірусам прастуды.

Калі з'явіцца калектыўны імунітэт?

З гэтага можа вынікаць, што паўторнае ўзаемадзеянне з каранавірусам, у тым выпадку, калі ён стане эндэмічным і мы будзем кантактаваць з меншым лікам узбуджальнікаў інфекцыі, можа прывесці да таго, што наш імунітэт стане дужэйшым дзякуючы антыцелам або Т-клеткам. І гэта дапаможа фармаванню калектыўнага імунітэту.

Але пакуль даследнікі папярэджваюць, што на фоне новай хвалі пандэміі нельга няўважліва ставіцца да свайго здароўя: ніхто не павінен зыходзіць з таго, што ў яго ўжо ёсць імунітэт супраць каранавіруса. Бо рызыка не мець яго пакуль значна вышэйшая.