У ЗША памёр палітык-рэспубліканец Боб Доўл

Ён удзельнічаў у Другой сусветнай вайне.

У Канзасе ва ўзросце 98 гадоў памёр амерыканскі палітык-рэспубліканец Боб Доўл. Пра гэта паведаміла выданне «Нью-Ёрк таймс». Ён удзельнічаў у Другой сусветнай вайне. У Італіі быў цяжка паранены, тры гады правёў у шпіталях. Мае баявыя ўзнагароды. Пасля вайны атрымаў юрыдычную адукацыю. Працаваў юрыстам.

У 1985-1996 займаў пасаду лідара рэспубліканцаў у Сенаце. Боб Доўл быў кандыдатам у віцэ-прэзідэнты ЗША на выбарах 1976 года пры дзейным прэзідэнце Джэральдзе Фордзе і ў прэзідэнты ЗША на выбарах 1996 года.

Абодва разы пацярпеў паразу ад дэмакратаў. Першы раз віцэ-прэзідэнтам быў абраны Уолтар Мандэйл пры абраным прэзідэнце Джымі Картэры, другі раз - на другі тэрмін пераабраны дзейны прэзідэнт Біл Клінтан.

Доўл стаў адзіным у гісторыі прадстаўніком двух найбуйнейшых партый, вылучаным і ў віцэ-прэзідэнты, і ў прэзідэнты, але не абраным ні на тую, ні на іншую пасаду.

Яго жонка Элізабэт Доўл - таксама дзеяч Рэспубліканскай партыі, былая міністарка транспарту і працы ЗША, сенатар ад штата Паўночная Караліна.