ЗША ўхвалілі прымяненне вакцыны ад каранавіруса Johnson & Johnson

Перавагі прэпарата пераважваюць вядомыя і патэнцыйныя рызыкі яго выкарыстання.

Упраўленне ў пытаннях якасці прадуктаў харчавання і медыкаментаў ЗША (FDA) ухваліла ўжыванне ў краіне вакцыны ад каранавіруса, распрацаванай кампаніяй Johnson & Johnson, гаворыцца ў паведамленні на сайце рэгулятара, паведамляе РБК.

Дазвол выдадзены для выкарыстання ў надзвычайных сітуацыях, вакцынавацца будуць людзі ад 18 гадоў. Вакцына Johnson & Johnson уводзіцца аднаразова.

«Усе наяўныя звесткі даюць выразныя доказы таго, што вакцына Janssen ад COVID-19 можа быць эфектыўнай для прадухілення COVID-19. Звесткі таксама паказваюць, што вядомыя і патэнцыйныя перавагі вакцыны пераважваюць вядомыя і патэнцыйныя рызыкі [яе выкарыстання]<...>», - паведамляе FDA.

Паводле звестак рэгулятара, вакцына эфектыўная ў 66-67% выпадкаў пры прадухіленні захворвання «ўмеранай» цяжкасці і ў 77-85% выпадкаў - пры прадухіленні цяжкіх выпадкаў.

Сама Johnson & Johnson ацаніла эфектыўнасць свайго прэпарата пасля трэцяй фазы клінічных выпрабаванняў у 66-72%.

Гэта ўжо трэцяя вакцына, ухваленая для ўжывання ў ЗША. У снежні рэгулятар выдаў дазвол вакцыне, распрацаванай амерыканскай кампаніяй Pfizer і нямецкай BioNTech, а таксама прэпарату, створанаму Moderna.

У кастрычніку Johnson & Johnson прыпыніла выпрабаванні вакцыны праз «невытлумачальную» хваробу аднаго з удзельнікаў. Пазней кампанія паведаміла пра гатоўнасць аднавіць даследаванні, бо не выявіла доказаў таго, што хвароба была выкліканая менавіта вакцынай.

Johnson & Johnson сцвярджала ў жніўні, што заключыла дамову з урадам ЗША на пастаўку 100 млн доз вакцыны. Кошт угоды будзе складаць $1 млрд.

У чацвер прэзідэнт ЗША Джо Байдэн паведаміў, што вакцынацыя ў ЗША ідзе з апярэджаннем графіка. Раней ён абяцаў прышчапіць 100 млн амерыканцаў на працягу першых 100 дзён свайго прэзідэнцтва. Робячы гэтыя заявы на 37-ы дзень свайго прэзідэнцкага тэрміну, ён адзначыў, што прышчэпкі зробленыя ўжо 50 млн грамадзян ЗША. «Сёння я тут, каб сказаць, што мы прайшлі ўжо паўдарогі... Гэта на тыдні апярэджвае графік, нават з улікам затрымак, з якімі мы сутыкнуліся нядаўна падчас снежных бур», - падкрэсліў прэзідэнт.