Суд Літвы палічыў пагрозай нацыянальнай бяспецы пашырэнне тэрмінала «Беларуськалія» ў Клайпедзе

Суд паставіў кропку ў спрэчцы кампаніі з уладамі Літвы, якая доўжылася паўтара года.

Галоўны адміністрацыйны суд Літвы (ГАСЛ) адхіліў скаргу тэрмінала Biriu kroviniu terminalas (БKT), які ажыццяўляе перавалку ўгнаенняў «Беларуськалія», на адмову літоўскага ўраду ў праекце пашырэння ў Клайпедскім марскім порце. Пра гэта паведамляе Interfax.by.

Нагадаем, у 2013 годзе «Беларуськалій» купіў у літоўскага бізнэсоўца Ігара Удавіцкага 30% тэрмінала БКТ. 100% акцый размешчанага побач Nemuno terminalas бізнэсовец кантралюе разам з жонкай Вольгай. У 2019 годзе БКТ выявіў жаданне набыць акцыі Nemuno terminalas. Аднак гэтая ўгода не ва ўсіх у Літве знайшла падтрымку. Некаторыя палітыкі ўгледзелі ў ёй пагрозу нацыянальнай бяспецы. Таму пачаліся судовыя цяжбы.

«Судзейская калегія, якая прызнала аргументы апеляцыйнай скаргі неабгрунтаванымі, адхіліла яе, а пастанову суда першай інстанцыі пакідае нязменнай», - гаворыцца ў пастанове ГАСЛ ад 3 сакавіка.

Такім чынам, суд паставіў кропку ў спрэчцы кампаніі з уладамі Літвы, якая доўжылася паўтара года. Улады Літвы лічаць БKT кампаніяй, якая не адказвае інтарэсам нацыянальнай бяспекі.

Папярэдняя інстанцыя, Віленскі акруговы адміністрацыйны суд, прыняла адпаведную пастанову ў снежні летась.

Паводле ацэнкі ГАСЛ, аспрэчваць пункт урадавай пастановы з'яўляецца правільным і абгрунтаваным, ён зроблены з улікам сукупнасці фактычных абставін і інфармацыі аб неадпаведнасці БKT інтарэсам нацыянальнай бяспекі.

Ігар Удавіцкі планаваў аб'яднаць тэрыторыю Nemuno terminalas з тэрыторыяй БKT з мэтай стварэння адзінага комплексу з новымі складамі, якія неабходныя для прыняцця аб'ёму ўгнаенняў «Беларуськалія». Бізнэсовец казаў, што калі гэта не будзе зроблена, то транзіт накіруецца праз іншыя парты. Удавіцкі запэўніваў, што «Беларуськалій» ніколі не ўздымаў пытанне аб павышэнні долі яго акцый у БKT.

«Беларуськалій» цяпер не знаходзіцца ў санкцыйным спісе Еўразвязу.