У Італіі супрацоўнік бальніцы 15 гадоў прагульваў працу і зарабіў 538 тысяч еўраў
11- 22.04.2021, 15:04
- 9,534
Стала вядома, як яму гэта ўдалося.
У Італіі работнік дзяржаўнага сектара, якога італьянская прэса называе «каралём прагульшчыкаў», усталяваў «нацыянальны рэкорд», прапускаючы працу на працягу 15 гадоў.
Пра гэта гаворыцца ў публікацыі The Guardian, пераклад - eurointegration.com.ua).
Паводле звестак паліцыі, працаўнік не прыходзіў на працу ў бальніцу ў Калабрыйскім горадзе Катандзара з 2005 года. Аднак на працягу гэтага часу яму выплачваўся штомесячны заробак і ўсяго ён «зарабіў» 538 тысячы еўраў.
Зараз мужчыну 67 гадоў, і яму выстаўленыя абвінавачванні ў злоўжыванні службовым становішчам, падробцы дакументаў і вымаганні пры абставінах, што абцяжарваюць віну.
Шэсць мэнэджараў таксама знаходзяцца пад следствам праз падазрэнне ў датычнасці да адсутнасці прагульшчыка на працы.
У ходзе расследавання пад кодавай назвай «Няпоўны працоўны дзень» паліцыя сабрала доказы са справаздачы аб наведвальнасці і заробку, а таксама з паказанняў калег. У 2005 годзе гэты чалавек, як сцвярджаецца, пагражаў дырэктарцы бальніцы, не даючы ёй падаць дысцыплінарны пратакол у сувязі з яго прагуламі.
Затым дырэктарка пайшла на пенсію, і гэты чалавек працягваў прапускаць працу, бо яго прысутнасць ніколі не правяралі ні пераемнік дырэктара, ні аддзел кадраў, паведаміла паліцыя.
У 2016 годзе ўрад Італіі зрабіў больш жорсткімі закон супраць прагульшчыкаў пасля таго, як некалькі гучных паліцэйскіх расследаванняў паказалі, наколькі шырока распаўсюджаная такая практыка ў дзяржаўным сектары.
Раней паведамлялася пра выпадак у Гішпаніі, дзе ў Валенсіі звольнілі чыноўніка, які 10 гадоў не хадзіў на працу, атрымліваючы пры гэтым 50 тысяч еўра ў год.