Кошт нафты ўпаў да мінімуму за тыдзень на фоне COVID-катастрофы ў Індыі

Дэлі - трэці ў свеце найбуйнейшы імпарцёр вуглевадародаў.

Кошты нафты зніжаюцца трэці дзень запар і абнаўляюць мінімумы за тыдзень на навінах з Індыі, дзе трэцяя хваля пандэміі набывае катастрафічны абарот, піша finanz.ru.

Ф'ючэрсы на гатунак Brent у чацвер падалі да 64,59 даляра за барэль, а кантракты на WTI апускаліся да 60,62 даляра на фоне індыйскай статыстыкі, што паказвае імклівы рост захворвання ў трэцюю хвалю.

На 13.50 паводле менскага часу Brent гандлюецца ў Лондане па 64,84 даляра за бочку, страчваючы 0,7% за дзень і 3,6% за тыдзень. WTI таннее на 0,6% адносна серады і 4% за чатыры дні, да 60,9 даляра за барэль.

«Інвестараў устрывожыў рост захворвання каранавірусам у Індыі, які можа прывесці да падзення попыту на вуглевадароднае паліва ў краіне, якая займае трэцяе месца сярод найбуйнейшых сусветных імпарцёраў нафты», - адзначае стратэг сыравінных рынкаў Ашчадбанк CIB Міхаіл Шэйбе.

За мінулыя дні ў Індыі было зарэгістравана 314 835 новых інфікаваных. Для параўнання: у ЗША максімальны прырост колькасці хворых, зафіксаваны 21 снежня, склаў 314 312 выпадкаў, а за ўвесь перыяд пандэміі больш за 300 тысяч выпадкаў рэгістравалася ўсяго двойчы.

Колькасць смерцяў ад каранавіруса ў Індыі за 24 гадзіны павялічылася на 2,1 тысячы і дасягнула 184 тысячы, а агульная колькасць выяўленых выпадкаў падбіраецца да адзнакі 16 мільёнаў. Раней на гэтым тыдні прэм'ер Індыі Нарэндра Модзі заявіў, што краіна сутыкнулася з каранавіруснай «бурай»: у перапоўненых бальніцах не стае ложкаў і апаратаў ШВЛ, у Нью-Дэлі дзейнічае поўны локдаўн да 26 красавіка, і наўрад ці ўлады змогуць зняць яго ў пазначаны тэрмін.

«Пакуль індыйскія імпарцёры, мяркуючы па ўсім, не скарачаюць заявак на куплю нігерыйскай нафты, аднак на гэтым тыдні Indian Oil Corporation збіраецца падаць чарговую заяўку на пастаўку вуглевадародаў з Заходняй Афрыкі і ў працэсе яе афармлення мы можам убачыць прыкметы, якія дазваляюць судзіць аб будучай дынаміцы попыту на нафту ў Індыі», - адзначае Шэйбе.

Між тым улады Японіі, якая займае чацвёртае месца сярод найбуйнейшых імпарцёраў нафты, плануюць у сувязі з ростам захворвання ў пятніцу абвясціць надзвычайнае становішча ў прэфектурах Токіа, Осака, Кіёта і Хіёга, усяго за тры месяцы да пачатку Алімпіяды ў Токіа.