Беларусы здымаюць грошы і з рублёвых, і з валютных дэпазітаў

Набегі на банкі прадаўжаюцца.

У красавіку ў банкаўскай сістэме прадоўжылася скарачэнне тэрміновых валютных ашчадкаў насельніцтва, а таксама назіралася невялікае зніжэнне тэрміновых рублёвых дэпазітаў, сведчаць статыстычныя звесткі Нацыянальнага банка, піша сайт naviny.by.

На 1 траўня тэрміновыя валютныя дэпазіты склалі 4,37 млрд даляраў і знізіліся за красавік на 1,5%, або на 68,5 млн даляраў. Тэрміновыя рублёвыя ашчадкі насельніцтва на 1 траўня склалі 4,66 млрд рублёў і знізіліся за красавік на 0,5%, або на 22,6 млн руб.

З пачатку года тэрміновыя валютныя дэпазіты насельніцтва скараціліся на 5,8%, або на 269,2 млн даляраў. У той жа час тэрміновыя рублёвыя ўклады павялічыліся на 123,1 млн рублёў, або на 2,7%.

Паводле звестак камерцыйных банкаў, насельніцтва ў 2021 годзе цікавіцца ў асноўным кароткатэрміновымі рублёвымі дэпазітамі. «Насельніцтва гатовае трымаць банкаўскія дэпазіты ў рублях на кароткія тэрміны - да трох месяцаў. Рабочыя стаўкі (якія рэальна прыцягнуць сродкі насельніцтва) - ад 17%», - паведаміў БелаПАН топ-мэнэджар аднаго з банкаў.

У той жа час, адзначаюць прадстаўнікі банкаўскага сектара, стаўкі ў валютных дэпазітах застаюцца на нізкім узроўні (1,25% гадавых у выпадку размяшчэння дэпазіту на тэрмін да года і 2,3% гадавых - у валютных дэпазітах на тэрмін звыш года).

Нізкія адсоткавыя стаўкі ў валютных дэпазітах, значэнне якіх устаноўленае камерцыйнымі банкамі з улікам рэкамендацый Нацбанкк, не матывуюць насельніцтва павялічваць валютныя ашчадкі ў банкаўскай сістэме, паведамілі прадстаўнікі банкаўскага сектара.

На думку назіральнікаў, павялічыць валютныя дэпазіты насельніцтва ў банкаўскай сістэме будзе цяжка не толькі з прычыны нізкай прыбытковасці такіх ашчадкаў, але і праз палітычны крызіс.

«Каб замежная валюта ў банкаўскую сістэму вярнулася, трэба ўрэгуляваць палітычны крызіс. Гэта дазволіла б павысіць давер насельніцтва да банкаўскай сістэмы. Без кардынальнага паляпшэння палітычнай сітуацыі ў краіне казаць аб поўным вяртанні валютных дэпазітаў, якія пакінулі банкаўскую сістэму ў мінулым годзе, не даводзіцца», - адзначыў у каментары фінансавы аналітык даследчай групы BusinessForecast.by Аляксандр Муха.

У 2020 годзе на фоне ўзніклага палітычнага крызісу ў Беларусі тэрміновыя валютныя дэпазіты ў банкаўскай сістэме скараціліся на чвэрць, тэрміновыя рублёвыя ашчадкі фізічных асоб - больш чым на 10%.