Мангуст, што катаецца на спіне барадавачніка стаў зоркай Сеціва

У Батсване знайшлі сапраўдных Цімана і Пумбу.

У цэнтры абароны жывёл у Батсване жывуць барадавачнік Пігі і мангуст Манга, якія неверагодна падобныя на знакамітых сяброў з серыі анімацыйных фільмаў «Кароль Леў» - Цімана і Пумбу.

Як і іх мульцяшныя двайнікі, парачка любіць гуляць разам, а малы нават катаецца на спіне свайго вялікага прыяцеля, піша Daily Mail (пераклад - «Апостроф»).

Праўда, прыхільнікі могуць заўважыць, што Манга - мангуст, а не сурыкат, як персанаж Цімон, але абодва віды цесна звязаныя.

Гэтыя двое пасябравалі праз аднолькава цяжкі лёс. Пігі выратавалі яшчэ ў маленстве, пасля таго як яго збіла машына. А Манга - сірата, яго мама загінула пад коламі аўто. Але цяпер яны знайшлі шчасце ў CARACAL - Цэнтры захавання афрыканскіх рэсурсаў: жывёл, супольнасцяў і землекарыстання.

Паколькі яны былі выратаваны, іх нельга бяспечна вярнуць у дзікую прыроду, таму парачка сяброў выступае ў якасці паслоў дзікай прыроды, дапамагаючы адукоўваць мясцовыя супольнасці.

Валанцёр цэнтра Кейтлін Вандэвале ведае Пігі і Манга з моманту іх з'яўлення ў прытулку. Са слоў 23-гадовай дзяўчыны, гэтыя жывёлы вылучаюцца сярод астатніх.

«Гэтыя двое ніколі не сварацца. Калі вы падыдзеце да іх, то заўважыце, што яны альбо спяць, альбо гуляюць. Калі гляджу на іх, адразу ўспамінаю Цімана і Пумбу», - сказала супрацоўніца цэнтра.

У мультфільме Цімана і Пумбу пастаянна спяваюць песню Hakuna Matata - гэтая фраза з суахілі перакладаецца як «не хвалюйся», і відаць, што менавіта так зараз ідуць справы ў рэальнай версіі прыяцеляў з «Караля Льва».