Кітайскі дыпламат пракаментаваў пагрозы Лукашэнкі спыніць транзіт
32- 21.07.2021, 14:54
- 67,756
Пекін заявіў, што чакае ад Менску стабільнасці ў рэгіёне.
Кітай спадзяецца, што Беларусь і Еўразвяз змогуць развязаць існыя рознагалоссі належным чынам. Пра гэта сёння заявіў пасол КНР у Маскве Чжан Ханьхуэй у каментары пра пагрозы Аляксандра Лукашэнкі абмежаваць транзіт з ЕЗ у Расею і Кітай, паведамляе ТАСС.
Кітайскі пасол адзначыў, што ягоная краіна звярнула ўвагу на заявы беларускага боку.
«Кітай спадзяецца, што зацікаўленыя бакі змогуць развязаць існыя рознагалоссі належным чынам», - сказаў дыпламат.
Чжан Ханьхуэй выказаў надзею, што бакі не будуць падрываць стабільнасць у рэгіёне.
Нагадаем, Лукашэнка прыстрашыў перакрыць транзіт грузаў з Нямеччыны ў Кітай і Расею.
Незалежныя аналітыкі мяркуюць, што Кітай можа націснуць на Расею, каб тая развязала пытанне Лукашэнкі, які ставіць транзіт пад пагрозу.