Эль Мюрыд: Крэмль упаў настолькі нізка, што шантажуе Кітай магчымасцю здачы сваёй тэрыторыі Японіі

Чаму пытанне спрэчных астравоў зноў з'явілася ў міжнародным парадку дня.

Новая актывізацыя тэмы Курыльскіх астравоў была заўважаная тым, каму яна і адрасаваная – Кітаем. Афіцыйны прадстаўнік МЗС КНР Чжаа Ліцзянь заявіў, што Кітай мяркуе спрэчку вакол Курыльскіх астравоў пытаннем двухбаковых стасункаў Японіі і Расеі, але выступае за павагу вынікаў Другой сусветнай вайны, піша ў сваім блогу расейскі эксперт-міжнароднік Анатоль Несміян (Эль Мюрыд).

Курылы – гэта шантаж Кітая. Крэмль упаў настолькі нізка, што шантажуе кітайцаў магчымасцю здачы сваёй тэрыторыі Японіі. З фактычнага гледзішча гэта будзе азначаць прэцэдэнт – перагляд вынікаў Другой сусветнай у Ціхаакіянскім рэгіёне. Кітай, як бок, якi атрымаў паводле вынікаў Другой сусветнай максімум магчымага, імкнецца ўтрымаць статус-кво (хоць якраз у пытанні Тайваня мяркуе гэтыя вынікі незакончанымі). Узмацненне пазіцый Японіі для кітайцаў непрымальнае.

Менавіта так і варта расцэньваць заяву кітайскага МЗС. Мы ў курсе, супраць каго вы спрабуеце сябраваць з Японіяй, і ўважліва за ўсім гэтым назіраем – вось, уласна, сутнасць адказу.

Крэмль, зразумела, не збіраецца вось так узяць і аддаць Курылы. І нават не таму, што яны так яму патрэбныя. Калі спатрэбілася – аддалі велізарны кавалак Баранцава мора і не паморшчыліся. У выніку, як высветлілася – ні за што. Курылы патрэбныя пакуль толькі таму, што гэта інструмент шантажу. Ну, аддамо – чым тады будзем шантажаваць?