Педагогі Менска стаяць у чэргах па даведкі, што ў іх няма даведак

Лукашысцкая бюракратыя ў дзеянні.

Штогадовы медагляд для педагогаў Менска, а яго праходзяць усе, хто працуюць у ВНУ, дзіцячых садках, школах, гарачым летам ператвараецца ў выпрабаванне на трываласць. Напрыклад, раніцай 7 ліпеня ў чарзе ў Гарадскі клінічны псіхіятрычны дыспансер на Бехцерава стаяла амаль 70 чалавек з іх паўсотні - пад пякучым сонцам, таму што ўсе ахвочыя ў будынак не змясціліся, паведамляе kp.by.

«Мозг плавіцца ў гэтым пекле, - расказала педагог Вераніка. - І стаім для таго, каб узяць даведку, што ў нас няма даведкі! А нібыта ў IT-краіне жывём! І так кожны год, дакладней кожнае лета. Няўжо нельга стварыць кампутарную базу з доступам у паліклініках. Я разумею, што інфармацыя пра тое, хто стаіць на ўліку ў псіханеўралагічным і наркалагічным дыспансеры з'яўляецца канфідэнцыяльнай, але ўпэўненая, што пераважная большасць педагогаў далі б дазвол на запыт такіх даведак у спецыяліста паліклінікі, абы ў чэргах не парыцца, асабліва цяпер у эпідэмію каранавіруса».

Такім чынам, мінімум 40 хвілін у чарзе на сонца, потым у рэгістратуру хвілін 15, а потым да медработнікаў яшчэ 5-10. Людзі, вядома, у масках, але іх шмат і яны побач...

«Адміністрацыі, трэба аддаць належнае, за час майго стаяння, актывізавалася і стала па 5 чалавек з вуліцы забіраць і афармляць даведкі не ў рэгістратуры, а ў іншым кабінеце, дзе ёсць база, але істотна на колькасць чалавек у чарзе гэта не паўплывала, - падкрэсліла педагог».

Бліжэй да поўдня Вераніка прыехала па наступную даведку ў Гарадскі клінічны наркалагічны дыспансер на Гастэлы.

- Тут ужо не такі аншлаг як на Бехцерава, у чарзе чалавек 10, працуюць тры акенцы рэгістратуры, - кажа педагог. - Але зноў жа - вельмі горача, вентылятар пад столлю ад духаты не ратуе...»