Апейкін: На выснову юрыстаў, наступствы для НАК Беларусі ад санкцый ЗША будуць катастрафічнымі

Мяркуецца, што Нацыянальны алімпійскі камітэт не зможа функцыянаваць наогул.

Выканаўчы дырэктар Фонду спартыўнай салідарнасці Аляксандр Апейкін распавёў пра недаацэньванне наступстваў санкцый ЗША ў дачыненні да Нацыянальнага алімпійскага камітэта (НАК) Беларусі, піша «Трибуна».

«Учора атрымалася стэлефанавацца з амерыканскімі юрыстамі, якія блізкія да працэсу ўвядзення санкцый у дачыненні да НАК Беларусі. На іх высновы наступствы для НАК Беларусі ад амерыканскіх санкцый будуць самымі катастрафічнымі. Вельмі дзіўна, што гэта дагэтуль ніхто не зразумеў і ўсе ўспрымаюць, што гэта абстрактная мера, што ўсё гэта сімвалічна.

Амерыканскія санкцыі накладваюць сур'ёзныя абмежаванні, пры якіх ніводная іншая федэрацыя, арганізацыя, контрагент, НАК іншай краіны не будзе ўзаемадзейнічаць з НАК Беларусі. Ніхто з партнёраў міжнародных не будзе нават разбірацца, што можна, а што нельга, таму што Беларусь не з'яўляецца асабліва важнай краінай у кантэксце сусветнага спорту або палітыкі. Рэжым Беларусі - рэжым-ізгой. Уплыў ЗША на сусветны спорт і ўклад у развіццё МАК вельмі істотны. І ўсе краіны будуць раўняцца на гэтае санкцыйнае рашэнне і не будуць ўзаемадзейнічаць з НАК Беларусі наогул. Такое меркаванне юрыстаў.

Іншы момант, які нас хвалюе і цікавіць: спартоўцы і супрацоўнікі НАК не змогуць прадстаўляць яго на міжнародных спаборніцтвах. Спартоўцы на алімпійскіх спаборніцтвах павінны будуць выступаць альбо пад нейтральным алімпійскім сцягам, альбо мяняць спартовае грамадзянства. НАК Беларусі прадстаўляць будзе нельга.

Думаю, нам усім гэта трэба прызнаць і зразумець, як у спартыўным свеце мы зможам жыць далей. НАК Беларусі не зможа якім-небудзь чынам падаваць заяўкі, ажыццяўляць плацяжы і гэтак далей. Міжнародная актыўнасць будзе выключаная.

Загадзя скажу: ніхто гэтыя санкцыі не лабіраваў і не прасоўваў. Чаму іх прынялі і як гэта адбылося пакуль невядома. Фактычна, НАК Беларусі не зможа функцыянаваць наогул», - падзяліўся Апейкін.