Зоркі беларускага спорту заклікалі да страйку
11- 14.09.2021, 7:43
- 17,072
Страйкаваць могуць усе.
Зоркі беларускага спорту падтрымалі страйкавы рух і заклікалі беларусаў рыхтавацца да страйку.
Свабодныя спартоўцы SOS_BY і Фонд спартыўнай салідарнасці выступілі з заявай:
- Беларусы, ужо год мы рухаемся да адной мэты і хочам быць свабоднымі, але чамусьці спадзяемся, што гэтую свабоду нам арганізуе нехта іншы.
Аляксандра Герасіменя, беларуская плыўчыха, трохразовая прызёрка Алімпійскіх гульняў, уладальніца залатых узнагарод чэмпіянатаў свету і Еўропы:
- У спорце, калі мы выходзім на пляцоўку, арэну або стадыён, мы можам разлічваць толькі на сябе. Мы ведаем, што побач знаходзяцца нашы таварышы з каманды, іх адвага, сіла. Трэнер і яго падказкі, нашы блізкія, іх вера. Але перамогу заўсёды здабываем самі - сваімі дзеяннямі.
Алена Леўчанка, бронзавая прызёрка чэмпіянату Еўропы ў баскетболе:
- Свабодныя спартоўцы SOS_BY і Фонд спартыўнай салідарнасці далучаюцца да страйкавага руху. У адпаведнасці з артыкулам 41 Канстытуцыі Беларусі грамадзяне маюць права на абарону сваіх эканамічных і сацыяльных інтарэсаў, уключаючы, у тым ліку і права на страйк.
Мы будзем страйкаваць і заклікаем кожнага далучыцца!
Кацярына Сныціна, экс-капітанка каманды Беларусі ў баскетболе, бронзавая прызёрка чэмпіянату Еўропы:
- Мы бачым, што Лукашэнка не збіраецца сыходзіць, а працягвае сядзець на шыі ў народа. Мэта страйку - аднаўленне справядлівасці і законнасці, вызваленне невінаватых людзей з турмаў, абарона нашых правоў на бяспечную працу і годную аплату. Страйкаваць могуць усе: рабочыя, лекары, настаўнікі, работнікі транспарту, супрацоўнікі прыватных кампаній, прадпрымальнікі і, вядома, спартоўцы.
Канстанцін Якаўлеў, галоўны трэнер гандбольнага клуба "Віцязь»:
- Страйкаваць павінен кожны! Цяпер гэта адзіны бяспечны і самы эфектыўны спосаб барацьбы з дыктатурай. Лукашэнка павінен сысці, годзе яму служыць, годзе яго карміць, годзе зарабляць яму грошы, годзе спансаваць гвалт.
Артур Удрыс, бронзавы прызёр клубнага чэмпіянату свету ў валейболе:
- Рэжым вырывае «нязгодных» па адным. Ладзіць паказальныя катаванні і яму гэта на руку. А вось чаго сапраўды баіцца рэжым, дык гэта масавых страйкаў. Таму што не ведае, што з імі рабіць. Масавасць гарантуе бяспеку. У гэтай сістэмы няма такой колькасці наручнікаў. Усю краіну не звольніць за прагулы.
Андрэй Краўчанка, сярэбраны прызёр Алімпійскіх гульняў у дзясяцібор’і:
- Беларусы, калі не мы самі і калі не цяпер, то ніхто і ніколі нас не вызваліць! Перамены - гэта наш выбар і наша адказнасць. Рыхтуемся да страйку ўсёй краінай. Нас большасць!