Што на гэты момант вядома пра праграміста, які застрэліў супрацоўніка КДБ

У момант трагедыі сына Андрэя Зэльцэра дома не было.

Амаль адразу пасля паведамлення пра здарэнне ў Менску ў кватэры на вуліцы Якубоўскага з'явіліся звесткі пра стралка – яго завуць Андрэй Зэльцэр, ён айцішнік з Менска і працаваў у ЕРАМ.

Пазней супрацоўнікі кампаніі і сябры мужчыны пацвердзілі zerkalo.io: на відэа са стральбой яны пазналі Андрэя.

– У яго запамінальная знешнасць, – тлумачыць сябар Андрэя, які пазнаў яго на відэа.

На кадрах, кажа ён, кватэра, дзе Андрэй жыў з жонкай і сынам. Хлопчыку, мяркуе, гадоў 9–10. Паводле словаў суседзяў, у момант трагедыі дзіцяці дома не было. Ён сышоў у школу.

Вядома, што Андрэю 31 год. Мяркуючы з звестак «Укантакце», у 2008-м ён атрымаў дыплом у менскім каледжы бізнэсу і права. На Facebook знайшлася старонка з ягоным фота ды імем. Там амаль ніякай інфармацыі пра чалавека, можна толькі заўважыць, што сярод ягоных сяброў нямала людзей з тэхнічнай адукацыяй, якія працуюць у IT. А вось сярод падпісак карыстальніка – толькі старонка, прысвечаная фехтаванню.

– Андрэй кандыдат у майстры спорту ў рапіры, але цяпер трэніруецца на шаблі. Займаецца ён у аматарскім клубе. Там год таму мы і пазнаёміліся, – расказвае прыяцель маладога чалавека. – Трэніроўкі ў яго тройчы на тыдзень, і ён іх не прапускае. Учора з 20 да 22 ён таксама быў на занятку. Я заязджаў у клуб са сваімі пытаннямі, і мы ненадоўга перасекліся. Настрой у яго быў добры, як заўсёды, на пазітыве.

У Instagram мянчук актыўна дзяліўся здымкамі з трэніровак. «Не выйсці з кулі на спаборніцтвах – зроблена. Усё бывае першы раз», – напісаў ён чатыры дні таму ў сацсетках. (У фехтаванні «куляй» звычайна называюць групу ўдзельнікаў на спаборніцтвах. – рэд.)

Мяркуючы з адзнакаў да здымкаў, яны былі зробленыя ў Цэнтры алімпійскай падрыхтоўкі «Стайкі» пад Менскам. Адзначым, што на мінулым тыдні там якраз праходзіў Рэспубліканскі турнір наймацнейшых у фехтаванні, удзельнічалі 180 чалавек. Акрамя таго, у верасні малады чалавек дзяліўся сваімі фота з веламарафону і трэйлавага забегу «Kaspersky Race Купалле», дзе ўзяў некалькі медалёў.

– Ён увесь час ездзіў на нейкія спартовыя турніры, – прадаўжае расказваць сябар і кажа, што Андрэй вельмі таварыскі чалавек. – Паўтара тыдні таму мы з ім прайшліся па парку. Звычайна, калі ў яго здараліся нейкія праблемы, ён пра іх расказваў, але тут не адчувалася нічога падазронага. Ён не казаў, што з боку міліцыі ці КДБ да яго ёсць нейкія пытанні. Вёў ён сябе абсалютна спакойна.

Следчы камітэт паведаміў, што жонку Андрэя Зэльцэра затрымалі ўчора ўвечары.

«Ягоная 40-гадовая жонка, якая таксама праводзіла відэаздымку злачынства і судзейнічала ягонаму здзяйсненню, затрыманая паводле падазрэння ў суўдзеле забойства супрацоўніка КДБ», – дадалі ва ўстанове.