У Беларусі зноў абвясцілі аранжавы ўзровень небяспекі праз моцны вецер
3- 16.01.2022, 20:37
- 7,508
МНС дало некалькі рэкамендацый.
На панядзелак, 17 студзеня, у Беларусі зноў абвясцілі аранжавы ўзровень небяспекі праз моцны вецер. Пра гэта паведамляе zerkalo.io са спасылкай на Белгідрамет Мінпрыроды і МНС.
"17 студзеня на большай частцы тэрыторыі Беларусі чакаецца ўзмацненне ветру парывамі да 15-20 м/с, удзень 17 студзеня і ноччу 18 студзеня месцамі 21-24 м/с, у асобных раёнах 25-27 м/с", — гаворыцца ў паведамленні.
У Менску 17 студзеня раніцай і ўдзень чакаецца ўзмацненне ветру парывамі да 15-20 м/с, месцамі па горадзе 21-23 м/с.
Нагадаем, паводле ўдакладненых звестак МНС, праз моцны вецер з парывамі да 32 м/с 14 студзеня, у пятніцу, пацярпелі 836 населеных пунктаў у 84 раёнах краіны, у тым ліку Менск.
Рэкамендацыі МНС пры моцным ветры:
- прыбярыце гаспадарчыя рэчы з двара і балконаў у дом (склеп), абрэжце сухія дрэвы, якія могуць нанесці шкоду вашаму жыллю;
- аўто пастаўце ў гараж, пры адсутнасці гаража аўто варта паркаваць удалечыні ад дрэў, а таксама слаба ўмацаваных канструкцый;
- знаходзячыся на дварэ, абыходзіце хісткія будынкі і дамы з няўстойлівым дахам;
- пазбягайце дрэў і разнастайных збудаванняў падвышанай рызыкі (мастоў, эстакад, трубаправодаў, ліній электраперадачы, патэнцыйна небяспечных прамысловых аб'ектаў).