«У міліцыі сказалі, што «памёр», а калі прыйшлі забіраць у морг - «А, гэта той, якога забілі?»

Журналісты пагаварылі з сястрой і сябрам Дзмітрыя Усхопава.

За гадзіну да Новага года міліцыянеры затрымалі на прыпынку 27-гадовага жыхара Рэчыцы Дзмітрыя Усхопава. Праз некалькі гадзін ён памёр у шпіталі. Раніцай 2 студзеня пра гібель маладога чалавека паведаміла гомельскае выданне «Флагшток». Сваякі ўпэўненыя, што мужчыну забілі. «Медиазона» паразмаўляла з блізкімі і сябрамі Усхопава.

На прыпынку

31 снежня а 23:00 27-гадовы жыхар Рэчыцы Дзмітрый Усхопаў стаяў з сябрам на прыпынку «Дзіцячы свет».

«Ён ехаў да мяне Новы год адсвяткаваць, стаяў на прыпынку з сябрам. «Я зараз пад'еду», – тэлефануе. Яны там пілі шампанскае і закусвалі мандарынам», - распавяла «Нашай Нiве» маці Усхопава Алена.

Як пацвердзіў «Медыязоне» сябар Дзмітрыя па імені Аляксандр, абодва яны сапраўды былі «ўжо нападпітку, падданыя добра». Неўзабаве, успамінае Аляксандр, да прыпынку падышлі два міліцыянты - Усхопаў прыцягнуў іх увагу, таму што гучна крычаў і хістаўся, размаўляў сам з сабой. У пераднавагодні вечар ён быў у дрэнным настроі - перажываў нядаўнюю смерць свайго знаёмага, тлумачыць Аляксандр.

Калі міліцыянты падышлі да Усхопава, той «пачаў трошкі даваць супраціў» - паспрабаваў вызваліцца, працягвае Аляксандр. Тады сілавікі выклікалі падмацаванне, і праз некалькі хвілінаў на прыпынак пад'ехаў «аўтазак» яшчэ з пяццю міліцыянтамі, кажа ён. Пакуль двое ўтрымлівалі Аляксандра, пяцёра ізноў прыбылых заштурхалі Усхопава ў машыну і павезлі.

«А тут усё, [па]ехалі: распіце. Рукі заламалі. А ён кажа: я да мамы еду, выпусціце, не затрымлівайце…» - цытуе «Наша Нiва» маці загінулага.

Пасля гэтага Аляксандр, з яго слоў, паехаў адзначаць Новы год да сваіх сваякоў. Усхопаў праз некалькі гадзін пасля затрымання памёр у бальніцы.

Відавочца, які звязаўся са сваякамі Усхопава, сцвярджае, што за 15-30 хвілін да яго затрымання бачыў машыну ППС на суседнім прыпынку «Крама Цэнтральны» - гэта прыкладна за 400 метраў ад «Дзіцячага свету». Ён заўважыў, што міліцыянты «п'яных забіраюць», і выказаў меркаванне, што «сілавікі па прыпынках шарыліся, план выконвалі», гаворыцца ў паведамленні, скрыншот якога ёсць у распараджэнні журналістаў.

РАУС, бальніца і морг

- Там або дапытвалі і білі, або адзін раз ударылі ў галаву, або стрэлілі з пнеўматыкі, я дакладна не ведаю. Ён страціў прытомнасць у РАУС, яго там жа аблівалі вадой, спрабавалі рэанімаваць, нацельная майка разарваная. Прывезлі яго ўжо з напаўголым тулавам і зверху ў куртцы. Валасы, цела, адзенне - усё мокрае, яно і цяпер мокрае ў моргу, - распавялі блізкія загінулага «Флагштоку».

Як сцвярджаюць родныя, у аддзяленне цэнтральнай раённай бальніцы Усхопава прывезлі, калі ён быў ужо ў коме.

- Са слоў тэрапеўта, спрабавалі яшчэ рэанімаваць адрэналінам і масажам сэрца, але час быў страчаны. Адправілі ў морг, а раніцай 1 студзеня зрабілі па ілжывай пастанове следчага тэрміновае ўскрыццё. У морг не пускалі. Прыехаў начальнік аддзялення судмедэкспертызы і выклікалі следчага, нам паказалі цела, - прыводзіў «Флагшток» словы родных. Калі яны ўбачылі цела, паталагаанатамы ўжо паспелі правесці «ўскрыццё чэрапна-мазгавой каробкі і брушной поласці».

Клінічную смерць у бальніцы зафіксавалі а 1.20. Сястра Усхопава Святлана сказала «Медиазоне», што спачатку родных «не хацелі пускаць у морг і ніякай інфармацыі не давалі».

— Учора ж выходныя [былі]. Наогул яны як бы не працуюць афіцыйна. І яны неафіцыйна хацелі выдаць нам яго цела, каб мы яго ўжо пахавалі. Ці мы забіраем, ці нічога паказваць нам не будуць, - кажа Святлана. - Ну, значыць, учора з ночы, і мы ўжо сёння да абеду павінны былі яго пахаваць, яны былі зацікаўленыя. Хацелі, каб я па АРІП аплаціла паслугі морга і яны як бы без квітанцыі, прама па АРІП-чэку выдалі б мне цела.

Каб усё ж трапіць у морг, сваякі запатрабавалі апазнання, сказаўшы, што не вераць у смерць Дзмітрыя, расказвае Святлана.

- Выклікалі начальніка судмедэкспертызы Рэчыцы, выклікалі следчага на маё патрабаванне. Нас апранулі ў касцюмы, завялі. Усё нам паказалі, я здымала, яны не перашкаджалі, - кажа сястра загінулага.

З ейных слоў, адзенне брата было «цалкам мокрае, цалкам-цалкам да ніткі», майка разарваная, а на целе - прыкметныя сінякі і ранкі.

- Сінякі на запясцях - відаць, што ад бранзалетаў, ад кайданкоў. Сінякі крыху на каленях. І драпіна над левым брывом, не драпіна, а такая круглая рана. Дыяметрам недзе сантыметра паўтара. І ўся цалкам сіняя спіна вышэй за пояс. Цалкам сінія плечы, - апісвае яна пашкоджанні, якія паспела заўважыць.

З яе слоў, судмедэксперты ў моргу нічога не гаварылі аб слядах на целе Усхопава.

- Не. Сказалі чакайце 30 дзён. Раней, [чым] праз 30 дзён, вы наша заключэнне не атрымаеце, - пераказвае яна размову са спецыялістамі. - Мы не забралі [цела]. Яны былі ўвогуле ў шоку, яны казалі: забірайце-забірайце. Мы сказалі, што мы яшчэ падумаем, што нам рабіць далей.

Цяпер Святлана, з яе слоў, рыхтуе звароты, у тым ліку, у Следчы камітэт.

- І ўсе ўсюды вакол усё ведаюць - і ў Гомелі, усюды, усюды. Ніякіх мер не прымаюць, ніякага расследавання не распачынаюць, - наракае яна.

«Закатавалі, як Ісуса Хрыста»

Маці Усхопава ўпэўненая, што яе сына забілі супрацоўнікі міліцыі.

- Гэта можна пісаць. Яны яго забілі - міліцыя забіла. Я ўдава «афганца», усё пішыце! А сына ад міліцыянера нарадзіла. Закатавалі сына, як Ісуса Хрыста, толькі яму 28 гадоў... Няхай нясуць мяне разам з сынам і кладуць у зямлю побач, - казала яна «Нашай Нiве».

Сястра Усхопава Святлана тлумачыць: яны са Змітром — ад адной маці; яе бацька, які служыў у Афганістане, застрэліўся ў 29 гадоў на вачах у маці, а бацька брата Аляксандр - былы следчы, ён прапрацаваў у органах амаль 15 або 20 гадоў. Зміцер, са слоў сястры, «быў добры хлопчык».

- Ён займаўся футболам. У менскай школе алімпійскага рэзерву, «Дынама-Менск». Потым здарыўся крызіс гэты эканамічны, іх вярнулі ў Рэчыцу. Ён адслужыў у войску, прыйшоў. З 2016 года працуе ў «Гаргазе», - кажа Святлана.

Станоўча адклікаецца пра загінулага Усхопава і яго сябар Аляксандр, які быў відавочцам яго затрымання.

- Ды быў нармальны дзяцюк, сябруем даўно ўжо, у школу адну хадзілі, за футбол хадзілі. Як бы і праца ў яго добрая, ён у «Гаргазе» працаваў - хадзіў, глядзеў уцечкі там, правяралі трубы вось гэтыя газавыя, - успамінае таварыш загінулага рэччаніна.

— Мы сябруем з Дзімам 16 гадоў, разам займаліся футболам, ды і наогул спортам. Ён умеў сябраваць. Ён быў мне як брат! І я ўпэўнены, што ніякіх наркотыкаў ён не ўжываў. Я стэлефанаваўся з ім апошні раз а 22:46, было чуваць па голасе, што ён выпіў, казаў, што стаіць на прыпынку з нашым агульным знаёмым. Раніцай я даведаўся пра смерць, і так здарылася, што сваякоў апавясцілі мы, сябры. Я бачыў яго цела ў моргу, і гэта не перадаць словамі. Збіты цалкам чалавек, рукі, ногі, спіна - усё ў сіняках, крывавая ранка над левай скроняй. Я проста ўпэўнены, што мела месца перавышэнне паўнамоцтваў, - сказаў «Медиазоне» іншы сябар загінулага па імені Аляксей.

Паводле інфармацыі яшчэ аднаго знаёмага Усхопава Мікіты, сілавікі намякалі блізкім, што той выпадкова атруціўся наркотыкамі; падобную версію ўвечары 2 студзеня вылучылі і ананімныя аўтары «Жоўтых сліваў»: «Гэтая жывёла зжэрла 2 грама мефедрона і адкінула капыты».

- Іх версія, што ў яго з сабой былі наркотыкі і ён праглынуў іх і гэта перадазіроўка. Што ім застаецца сказаць? Не скажуць жа яны, што так, мы яго так збілі, што ён памёр, - кажа Мікіта.

Цяпер, на сцвярджэнне сяброў і родных, міліцыя спрабуе аказваць на маці Усхопава ціск: пагражае правесці ў яе хаце ператрус.

Бацька Усхопава Аляксандр даў пакуль толькі адзін кароткі каментар для прэсы.

- У міліцыі нам сказалі «памёр», а калі прыйшлі забіраць у морг, сказалі: «А, гэта той, якога забілі?» - распавёў ён «Нашай Ніве».