Ва Украіну прыбылі сотні новых Javelin з ЗША

Што яшчэ ёсць у трэцяй партыі амерыканскай зброі?

У аэрапорт Барыспаль прыбыў трэці амерыканскі самалёт са смяротнай зброяй з пакета дапамогі на суму 200 мільёнаў даляраў. Украіна атрымала 300 Javelin. Пра гэта паведамляе прэс-служба Генштаба УСУ.

"Гэтая дапамога, якая ўключае амаль 200 тысяч фунтаў смяротнай зброі, у тым ліку боепрыпасы для абаронцаў Украіны на лініі фронту, дэманструе жорсткую прыхільнасць Злучаных Штатаў суверэннаму праву Украіны на самаабарону", – гаворыцца ў паведамленні.

У Генштабе УСУ таксама нагадалі, што прэзідэнт ЗША Джо Байдэн сказаў прэзідэнту РФ Уладзіміру Пуціну, што ў выпадку далейшага ўварвання Расеі ва Украіну Злучаныя Штаты дадуць Кіеву значна большае абсталяванне для абароны ў дадатак да ўжо прадстаўленага.

Таксама ў паведамленні прыводзяцца словы часовай паверанай у справах ЗША Крысціны Квін, якая падкрэсліла, што Злучаныя Штаты, хаўруснікі і партнёры на баку Украіны і працуюць разам, каб паскорыць выдачу дапамогі Украіне.

Таксама Квін працытавала Байдэна з нагоды наступстваў у выпадку працягу Расеяй агрэсіі супраць Украіны: "Калі ўсялякія расейскія войскі пяройдуць украінскую мяжу, то гэта будзе ўварваннем, за якім будзе ісці хуткая, жорсткая і аб'яднаная рэакцыя. Гэта будзе рэакцыя і ЗША і нашых хаўруснікаў".

Яна таксама адзначыла, што ўкраінскія вайскоўцы дысцыплінаваны, добра забяспечаны і навучаныя.

"Хачу падкрэсліць, што расейскія жаўнеры, якія пойдуць ва Украіну на загад Крамля, сутыкнуцца з жорсткім супраціўленнем, і Расея зазнае значныя страты. Калі прэзідэнт Пуцін пойдзе на гэты безразважны крок, то мы дамо большую тэхнічную дапамогу Украіне, чым мы ўжо далі", - падкрэсліла Крысціна Квін.

Часовая павераная ў справах ЗША адзначыла, што перавага аддаецца дыпламатыі, у рамках якой адбываецца камунікацыя з партнёрамі з NATO і Украіны. Таксама яна заявіла, што такія пастаўкі працягнуцца ў будучыні.

Акрамя таго, яна паведаміла, што ў гэтым годзе Украіна атрымала больш абароннай падтрымкі ЗША, чым у кожны з папярэдніх гадоў, пачынаючы з 2014 года. Паводле яе слоў, у 2022 годзе было выдадзена сродкаў абароны на больш як 650 млн даляраў, а з 2014 года выдадзена больш чым на 2,7 млрд даляраў.

Нагадаем, сёння міністр абароны Аляксей Рэзнікаў анансаваў чацвёртую партыю дапамогі ад ЗША.

Раней ЗША ўхвалілі перадачу Украіне ўладамі Эстоніі, Літвы і Латвіі зброі амерыканскай вытворчасці - Javelin і зэнітна-ракетных сістэм Stinger.