Міністэрства аховы здароўя дазволіла вярнуцца да працы «Нардзіну» і «Тром Дантыстам Плюс»

Але прыпыніў працу яшчэ аднаго цэнтру.

Лячэбна-кантрольная рада Міністэрства аховы здароўя дазволіла аднавіць дзеянне ліцэнзій на медыцынскую дзейнасць ТАА «Медычны цэнтр «Нардзін» і ТАА «Тры Дантысты Плюс», паведамляе zerkalo.io са спасылкай на прэс-службу ведамства.

У Міністэрстве аховы здароўя нагадалі, што дзейнасць «Нардзіна» і «Тры Дантысты Плюс» была прыпыненая з 15 жніўня праз грубыя парушэнні заканадаўства аб ліцэнзаванні, заканадаўства аб ахове здароўя, санітарна-эпідэміялагічным дабрабыце насельніцтва.

«Прааналізаваўшы і абмеркаваўшы матэрыялы праверак, прадстаўленыя паўторнымі камісіямі Міністэрства аховы здароўя, лячэбна-кантрольная рада прыйшла да высновы, што ўсе выяўленыя парушэнні ліквідаваныя», — гаворыцца ў паведамленні.

Пры гэтым Міністэрства аховы здароўя з 14 кастрычніка прыпыняе дзеянне ліцэнзіі ТДА «Элітан плюс». Адзначаецца, што камісія выявіла ў медцэнтры грубыя парушэнні заканадаўства аб санітарна-эпідэміялагічным дабрабыце насельніцтва.

і ліцэнзаванні:

• парушэнні санітарна-эпідэміялагічных патрабаванняў, санітарных норм і правіл;

• адсутнасць дамоў на тэхнічнае абслугоўванне і рамонт медыцынскай тэхнікі;

• адсутнасць медыцынскай дакументацыі, наяўнасць і вядзенне якой патрабуюцца для выканання работ і (або) выканання паслуг, якія складаюць ліцэнзійную дзейнасць;

• непрадстаўленне ў Міністэрства аховы здароўя на працягу месяца з дня назначэння дакументаў аб назначэнні на пасады медыцынскіх работнікаў іншых работнікаў замест заяўленых пры атрыманні ліцэнзіі.

«Выяўленыя недахопы і парушэнні ў сукупнасці могуць пацягнуць прычыненне шкоды дзяржаўным або грамадскім інтарэсам, навакольнаму асяроддзю, жыццю, здароўю, правам і законным інтарэсам грамадзян, суб'ектаў гаспадарання або стварыць пагрозу прычынення такой шкоды», — гаворыцца ў заяве.

Нагадаем, 13 траўня ў медцэнтр «Нардзін» і да яго заснавальніка Дзмітрыя Сайкова прыйшлі сілавікі з Дэпартамента фінансавых расследаванняў КДК. Як пасля растлумачылі ў ведамстве, у цэнтры знайшлі парушэнні пры правядзенні артапедычных умяшанняў і факты ўхілення ад выплаты падаткаў. Пазней у КДК анансавалі новыя праверкі прыватных медцэнтраў: нібыта ў іх нярэдка завышаюць кошты і навязваюць пацыентам непатрэбныя паслугі.

Акрамя таго, 16 траўня Міністэрства аховы здароўя пасля праверак прыпыніла ліцэнзію медцэнтраў «Ладэ» і «Клініка А1». Цэнтр «Ладэ» абараніў ліцэнзію і праз месяц аднавіў працу, аднак яшчэ ў пачатку ліпеня яго рахункі заставаліся заблакаванымі Дэпартаментам фінансавых расследаванняў КДК. А вось «Клініка А1» у выніку была зачыненая.