Беларус, які атрымаў позву на заводзе ў Чэлябінску, распавёў аб пагрозах
30- 1.12.2022, 17:15
- 22,172
Разам з ім «запрашэнне» ў вайсковы камісарыят атрымалі яшчэ амаль 80 чалавек.
Грамадзяніну Беларусі па імені Аляксандр, які працуе на Чэлябінскім цукровым заводзе, уручылі позву ў вайсковы камісарыят проста на працоўным месцы, хаця ён нават не мае расейскага дазволу на жыхарства.
Ён звязаўся з Telegram-каналам «Беларусь галаўнога мозгу», каб расказаць падрабязнасці гэтай гісторыі. Высветлілася, што разам з ім «запрашэнне» атрымалі яшчэ амаль 80 чалавек, частка з якіх - грамадзяне Узбекістана.
Са слоў Аляксандра, ён паслухаўся парад і адмовіўся ісці ў вайсковы камісарыят. Пасля гэтага да яго падышоў брыгадзір і заявіў, што ў панядзелак па яго прыйдуць і адправяць туды гвалтам.
Пры гэтым, як піша мужчына, з завода ён не можа звольніцца з фінансавых прычын:
«Я так проста не магу звольніцца. Нам 2 месяцы не плацілі заробак, абяцалі да Новага года аддаць усю запазычанасць, і я як бы, атрымліваецца, пазычыў грошы на жыццё на гэты час. І калі цяпер звольнюся, то мне ніхто нічога не аддасць. Але таксама я разумею, што жыццё даражэйшае і ўсімі шляхамі буду спрабаваць пазбегнуць вайсковага камісарыята».