Амбасадар Украіны прапанаваў Нямеччыне прыняць закон аб ленд-лізе як у ЗША

Украіне патрэбнае самае сучаснае нямецкае ўзбраенне.

Амбасадар Украіны ў Нямеччыне Андрэй Мельнік заклікаў Берлін прыняць закон аб ленд-лізе аб ваеннай дапамозе Кіеву па прыкладзе ЗША. Аб гэтым украінскі дыпламат сказаў у інтэрв'ю Bild, апублікаваным 1 траўня.

26 красавіка на авіябазе ВПС ЗША Рамштайн у Нямеччыне прайшла сустрэча кансультатыўнай групы ў абароне Украіны з удзелам кіраўнікоў мінабароны больш чым 40 краін. Падчас сустрэчы міністр абароны ФРГ Крысціне Ламбрэхт заявіла, што Нямеччына паставіць ва Украіну зенітныя самаходныя ўстаноўкі Gepard.

Журналісты Bild спыталі Мельніка, што яшчэ канкрэтна Украіна патрабуе ад Нямеччыны.

Са слоў дыпламата, Украіна хацела б убачыць сярод іншага «хуткі экспарт 88 танкаў Leopard, 100 танкаў Marder, самаходных гаўбіц і шмат чаго іншага», але вельмі важнае «пераасэнсаванне ў свядомасці людзей».

Мельнік адзначыў, што Еўропа цяпер перажывае самую вялікую вайну за 80 гадоў - перамагчы з 30 або 100 танкамі ў ёй немагчыма.

На думку пасла Украіны, «нямецкі закон аб ленд-лізе, як у ЗША, і доўгатэрміновы хаўрус супраць Расеі былі б важныя».

Мельнік прывітаў пастанову Берліна перадаць Кіеву 30 танкаў Gepard, але мяркуе, што «гэтага недастаткова», тым больш, што для іх «бракуе боепрыпасаў».

Акрамя таго, танкам Gepard ужо 40 гадоў, а, каб перамагчы Расею, Украіне патрэбнае самае сучаснае нямецкае ўзбраенне», падкрэсліў дыпламат.

Мельнік заявіў, што пастаўкі зброі Украіне ад ФРГ не справакуюць Трэцюю сусветную вайну, бо яна ўжо пачалася. Прэзідэнт РФ Уладзімір Пуцін вядзе яе на знішчэнне супраць усяго Захаду, рэзюмаваў амбасадар Украіны ў Нямеччыне.

Лэнд-ліз - праграма, у рамках якой ЗША забяспечвалі хаўруснікаў па антыгітлераўскай кааліцыі харчаваннем, нафтай і ўзбраеннем падчас Другой сусветнай вайны. Падпісаў закон аб ленд-лізе 11 сакавіка 1941 года прэзідэнт ЗША Франклін Рузвельт. Паводле ўмоваў той праграмы, аплаціць пастаўкі можна было ўжо пасля перамогі, прычым толькі тую тэхніку, якая засталася цэлай пасля вайны. Акрамя таго, частка пазык хаўруснікам была дараваная.

Сенат ЗША 6 красавіка аднагалосна прыняў закон аб адраджэнні праграмы ленд-лізу. Палата прадстаўнікоў ЗША на паседжанні 28 красавіка прыняла закон аб ленд-лізе для Украіны. Цяпер яго адправяць на подпіс прэзідэнту ЗША Джо Байдэну.