Стала вядома, на колькі падоўжаць ваеннае становішча і мабілізацыю ва Украіне

Зяленскі падпісаў указ.

З'явіліся падрабязнасці ўнесеных прэзідэнтам Украіны Уладзімірам Зяленскім законапраектаў пра прадаўжэнне тэрмінаў дзеяння ваеннага становішча і новыя часавыя рамкі правядзення агульнай мабілізацыі.

Пра гэта паведамляе Афіцыйны вэб-партал парламента Украіны.

Кіраўнік дзяржавы прапанаваў 25 траўня прадоўжыць тэрмін дзеяння ваеннага становішча на 90 дзён, гэта значыць да 23 жніўня. Матывам такой пастановы стала прадаўжэнне шырокамаштабнай узброенай агрэсіі РФ супраць Украіны. Раней Вярхоўная Рада прадаўжала дзеянне ваеннага становішча на 30 дзён.

Акрамя таго, Зяленскі выдаў указ пра падаўжэнне тэрмінаў правядзення агульнай мабілізацыі. Праз агрэсію РФ яе таксама плануюць падоўжыць з 25 траўня яшчэ на 90 дзён.

Нагадаем, Украіна ўвяла рэжым ваеннага становішча раніцай 24 лютага 2022 года пасля пачатку поўнамаштабнага расейскага ўварвання. Пасля гэтага Рада прадоўжыла ваеннае становішча на 30 дзён, а потым яшчэ на 30 дзён – да 25 траўня.

Згодна з законам пра ваеннае становішча, на тэрыторыі Украіны можа ўводзіцца абавязковая працоўная павіннасць, адчужэнне асабістай маёмасці, абмежаванне на перамяшчэнне, каменданцкая гадзіна, забарона на гандаль зброяй і алкаголем, забарона на масавыя мерапрыемствы і страйкі, абмежаванне працы сродкаў сувязі і інтэрнэту, а таксама забарона ваеннаабавязаным мяняць месца жыхарства.