Якіх вайскоўцаў, што ваявалі супраць Украіны, могуць хаваць у Беларусі?

Лукашысты наўпрост бралі ўдзел у агрэсіі супраць суседняй краіны.

Украінская разведка паведаміла, што ў некалькіх населеных пунктах Беларусі прайшло пахаванне вайскоўцаў, якія падахвоціліся заключыць кантракты з расейскімі ПВК. Між іншым, жалобныя мерапрыемствы па загінулых жаўнерах-кантрактніках прайшлі ў горадзе Мар'іна горка Менскай вобласці (базіруецца 5 асобная брыгада спецыяльнага прызначэння).

У Асіповічах Магілёўскай вобласці (базіруецца 51 змешаная артылерыйская група) хавалі адстаўнога афіцэра і былога жаўнера-кантрактніка.

Раней крыніцы сайта Charter97.org паведамлялі, што сярод забітых і параненых акупантаў на тэрыторыі Украіны ёсць беларускія вайскоўцы.

Таксама пра удзел лукашэнкаўскіх войскаў у агрэсіі заяўлялі простыя ўкраінцы. Жонка вядомага ўкраінскага кампазітара Ігара Поклада Святлана| ў эксклюзіўным інтэрв'ю сайту «Гордон» распавяла, што ў Ворзелі пад Кіевам былі беларускія вайскоўцы.

- У Ворзелі было тры ратацыі акупантаў. Першымі зайшлі вырадкі, як кажуць, гарматнае мяса. Іх паслалі на смерць, і яны вакол сябе сеялі смерць.

Другая ратацыя - гэта беларуская брыгада. Яны стаялі з беларускімі сцягамі. Няхай Лукашэнка кажа што заўгодна, што Беларусь не ўступала ў вайну, але гэта няпраўда. Яны тут стаялі, у Ворзелі. Пра гэта, дарэчы, нідзе не гаварылі. Але гэта факт. Косця пра гэта таксама шмат разоў расказваў. Нават калі б не было сцягоў, беларусаў лёгка пазнаць па гаворцы, па акцэнце. Дык вось з беларусамі ён змог дамовіцца і пачаў вазіць гуманітарную дапамогу. Яны не тое каб лаяльна настроены былі, але, ва ўсякім разе, дазвалялі дастаўляць людзям прадукты.

Паведамлялася, што лукашэнкаўскі вайсковец мог удзельнічаць у катаванні мірнага насельніцтва ў Бучы.

У кватэру мужа і жонкі ў гэтым горадзе ўварваліся беларус і чачэнец. Акупанты чатыры дні катавалі мужчыну, ад чаго той загінуў.

«Гэта была адна з іх баз. Беларус і чачэнец менавіта іх катавалі, трымалі чатыры дні ў пакоі. Мужчыну ўвесь час збівалі. Яна прасіла хаця б не біць пры ёй мужчыну», - распавёў украінскі вайсковец выданню 24tv.ua.