Пад Ізюмам правалілася расейская выведка боем
2- 23.05.2022, 13:47
- 14,824
Акупанты адступілі са стратамі.
За мінулы дзень у Харкаве ў выніку варожых абстрэлаў пацярпелі два мірныя жыхары, паведаміў кіраўнік АВА Алег Сінягубаў.
«Учора з рэактыўных сістэм залпавага агню быў абстраляны Кіеўскі раён. Сёння раніцай расейскія акупанты нанеслі ўдары непадалёк ад Паўлава Поля, набой упаў каля прыпынку грамадскага транспарту. 1 чалавек атрымаў раненні выбуховай хваляй. За дзень у Харкаве - 2 параненых», - напісаў ён у сваім Telegram.
Ён паведаміў, што УС РФ прадаўжаюць таксама абстрэльваць населеныя пункты вобласці, там таксама ёсць параненыя сярод мірнага насельніцтва.
«За мінулы дзень абстрэльвалі Цыркуны, 2 параненых. У Першамайскім - 1 паранены. 1 цывільны пацярпеў ад абстрэлаў Балаклеі. Уначы абстрэлы акупантаў зазнаў Чугуеўскі раён, у выніку абстрэлу заняліся прыватныя дамы, крама і кавярня» На шчасце, ніхто не пацярпеў», - напісаў Сінягубаў.
Ён дадаў, што пад Ізюмам вораг на асобных адрэзках спрабаваў правесці выведку боем, але панёс страты і адступіў.