Беларусы пераводзілі грошы з-за мяжы выгадным курсам, а цяпер скардзяцца на мінусавы баланс

Мінус утварыўся па картах літоўскіх і польскіх банкаў.

Беларусы, якія ў траўні пераводзілі з-за мяжы грошы праз сэрвіс Paysend, скардзяцца, што іх банкаўскія рахункі сышлі ў вялікія мінусы. У некаторых карыстальнікаў адмоўны баланс даходзіць да некалькіх тысяч еўраў. Мінус утварыўся па картах літоўскіх і польскіх банкаў. Некаторыя з кліентаў сэрвісу абмяркоўваюць варыянт звярнуцца ў паліцыю краін, у якіх цяпер знаходзяцца. Нагадаем, Paysend - адзін з самых папулярных у беларусаў сэрвісаў у пераводзе грошай, піша zerkalo.io.

Што гэта за сервіс, як ён працуе і чаму ім актыўна карыстаюцца беларусы

Сэрвіс уа пераводзе грошай Paysend — адзін з асноўных спосабаў, якім цяпер актыўна карыстаюцца беларусы. Ён дазваляе перакінуць сродкі з адной карты на іншую, за гэта бяруць камісію 1,5 еўра за адзін перавод. У Беларусь грошы можна адправіць у далярах ці беларускіх рублях на карты Visa ці MasterCard. «Каб пазбегнуць магчымых праблем, мы рэкамендуем адпраўляць у далярах», - рэкамендуе сэрвіс тым, хто хоча перавесці сродкі ў нашу краіну.

У Paysend дзейнічае спецыяльны курс, па якім еўра канвертуецца ў даляры і беларускія рублі. Напрыклад, за адзін еўра сёння даюць 2,476 рубля. У першай палове траўня курс даходзіў да 3,5 рублёў. Пры гэтым курс еўра па Нацбанку ў першыя дні сакавіка быў на ўзроўні 2,79 рубля, а пазней да сярэдзіны месяца і ўвогуле знізіўся да 2,6 рублёў. У банках курсы продажу гэтай валюты, адпаведна, былі крыху вышэйшыя, чым у Нацбанку.

Прывядзем прыклад. Дапусцім, у адзін з дзён у пачатку траўня пры пераводзе 100 еўраў на беларускую картку паступала сума 350 рублёў (калі курс канвертацыі быў 3,5 рубля за адзін еўра). Напрыклад, 1 траўня «Беларусбанк» прадаваў еўра курсам 2,79 рубля. Пры такім курсе за 350 рублёў можна было набыць 125,5 еўра. Калі адабраць камісію сэрвісу 1,5 еўра, то «навар» складаў амаль 24 еўры з адпраўленай «соткі».

Пра тое, як працавала гэтая схема, дастаткова падрабязна расказваў «Онлайнер».

«У людзей былі запазычанасці да 1000 еўраў». Што гавораць кліенты сэрвісу

У апошнія некалькі дзён кліенты Paysend закідалі негатыўнымі водгукамі сэрвіс у Google Play. Многія з іх датычацца пераводаў у Беларусь з-за мяжы.

«Спісваюць розніцу ў курсе праз сваю ж памылку. Калі скідалі еўра па 3,5 рубля, потым стаў курс 2,5 рубля, то розніцу 1 рубель спісваюць з карты праз час, - напісаў адзін з карыстальнікаў сэрвісу. - У людзей былі запазычанасці да 1000 еўраў. Я сам карыстаўся дадаткам раней не адзін раз, але ў сувязі з апошнімі падзеямі заблакаваў аплаты праз інтэрнэт са сваёй карты, адвязаў карту ад акаўнта і папрасіў у тэхпадтрымцы выдаліць мой рахунак».

«Скачаў дадатак, перавёў грошы з Еўропы ў Беларусь курсам, выстаўленым гэтым дадаткам, у выніку праз тыдзень яны самавольна без майго ведама знялі з маёй банкаўскай карты 870 еўраў, спасылаючыся на тое, што яны тады памыліліся курсам і цяпер знялі розніцу. Буду цяпер пісаць у паліцыю аб крадзяжы грашовых сродкаў», - удакладняе яшчэ адзін карыстальнік.

«Зрабілі спісанне сродкаў з карты пасля пераводаў у Беларусь. Загналі карту ў мінусы. Як такое магчыма? Бо калі сродкаў недастаткова, транзакцыя павінна быць скасаваная, а Paysend праз пару тыдняў прачнуўся і наважыў зняць з людзей грошы», - паскардзіўся трэці кліент сэрвісу.

Калі абагульніць, то кліенты Paysend паведамляюць аб спісанні грошай з карт некаторых літоўскіх і польскіх банкаў. Яны расказваюць, што з адмоўным балансам сутыкнуліся тыя, хто пераводзіў грошы з 6 да 18 траўня.

Адзін з карыстальнікаў напісаў, што пераводзіў у Беларусь 6300 еўраў, а днямі ў яго спісалі з карты амаль 1800 еўраў. У некаторых кліентаў сэрвісу спісалі ў межах 30% ад сумы пераводу, але ў асобных, з іх слоў, даходзіць да 70%. У некаторых карыстальнікаў утварыўся мінус некалькі тысяч еўраў.

Прадстаўнікі кампаніі Paysend Technology Limited пакінулі некалькі каментараў у Google Play. «Paysend не працуе з пасярэднікамі і мае выключна наўпроставыя інтэграцыі і разлікі з міжнароднымі аплатнымі сістэмамі, а таксама з валютнымі біржамі ў розных краінах. У момант адпраўкі мы арыентуемся на онлайн таргі і паказаныя ў іх курсы валют. Часам гэтыя курсы выгаднейшыя за курсы Нацыянальнага банка, часам - не, - удакладнілі прадстаўнікі сэрвісу. - Выкарыстанне актуальных курсаў дазваляе захаваць баланс выгады пераводаў праз нашу сістэму і для адпраўніка, і для атрымальніка».

У іншым каментары гаворыцца: «Мы выкарыстоўваем тэхналогіі імгненных пераводаў грашовых сродкаў Visa Direct, MasterCard MoneySend і UnionPay MoneyExpress, якія дазваляюць залічваць пераводы ў рэжыме рэальнага часу. На жаль, не ўсе банкі падтрымліваюць гэтыя тэхналогіі, таму часам тэрмін апрацоўкі пераводу банкам-атрымальнікам можа дасягаць 3-х працоўных дзён».

Атрымаць аператыўны каментар у кампаніі Paysend не ўдалося.