Тэхналогіі цалкам змянілі прыроду вайны

Цяпер свету трэба адаптавацца да новых рэалій.

Калі Расея ўварвалася ва Украіну, Міністэрства абароны ЗША звярнулася да групы экспэртаў у машынным навучанні і штучным інтэлекце, каб тыя дапамаглі разабрацца з неймавернай колькасцю інфармацыі пра вайну. З часам каманда стварыла код і алгарытмы машыннага навучання, якія «асабліва каштоўныя для аналізу складанай карціны», адзначае намесніца міністра абароны Кэтлін Хікс у нядаўнім інтэрв'ю выданню Wired. НВ абраў галоўнае і зрабіў пераклад матэрыялу.

Гэта паказвае, што тэхналогіі карэнным чынам мяняюць характар вайны, а таму ЗША павінны адаптавацца, каб захаваць сваю перавагу.

«Мне падабаецца казаць, што біты могуць быць такім ж важнымі, як і кулі», – кажа яна, растлумачыўшы важнасць праграмнага забеспячэння, звестак і машыннага навучання. Цяпер тэхналогіі развіваюцца вельмі хуткімі тэмпамі, з'яўляецца ўсё больш кірункаў, канкурэнцыя расце. І хаця Расея можа ўяўляць меншую тэхналагічную пагрозу праз санкцыі і карупцыю, Кітай ператварыўся з грознага практычна роўнага апанента. Хікс адзначае, што зараз кітайскі ўрад асабліва засяроджаны на развіцці штучнага інтэлекту.

Падчас вайны ва Украіне алгарытмы штучнага інтэлекту выкарыстоўваліся для перахопу, праслухоўвання і расшыфроўкі перамоў расейскіх жаўнераў і камандзіраў; тэхналогіі распазнання асоб ужываліся для ідэнтыфікацыі загінулых расейцаў, выкарыстоўваючы базу з 10 млрд фатаграфій, сабраных у сацыяльных сетках; Мінлічбы карысталася ШІ, каб па фота трупаў расейскіх вайскоўцаў знайсці іх старонкі ў сацыяльных сетках і паведаміць пра смерць сябрам і блізкім; беспрэцэдэнтная хакерская кампанія супраць Расеі паказвае, што кіберпрастора таксама з'яўляецца важнай часткай дзяржаўнай бяспекі.

Дроны, якімі актыўна карыстаюцца УСУ, выкарыстоўваюць гатовыя алгарытмы для выяўлення і навігацыі, сталі магутнай зброяй супраць састарэлай стратэгіі і тэхнікі расейцаў. Інавацыі дапамагаюць распрацоўваць зброю з галавакружнай хуткасцю - у сакавіку ЗША распавялі пра паспяховую распрацоўку спецыяльных беспілотнікаў спецыяльна для ўкраінскіх войскаў. Асабліва гэта выдзяляецца на фоне 20-гадовай распрацоўкі знішчальніка F-35.

Хоць цяпер ЗША дапамагаюць Украіне фінансава, пастаўкамі ўзбраенняў і тэхналогій, ёсць людзі - унутры і за межамі Пентагона - якія занепакоеныя тым, што ЗША дрэнна падрыхтаваны да таго, каб адаптавацца да войнаў будучыні.

Прэстан Данлэп, які на мінулым тыдні пайшоў у адстаўку з пасады галоўнага архітэктара Міністэрства Вайскова-Паветраных Сіл, параўнаў існую сітуацыю з праблемай вялікага бізнэсу: паспяховыя кампаніі могуць прайграць канкурэнцыю меншым кампаніям, якія хутчэй адаптуюцца да новых тэхналогій. Данлэп адзначае, што амерыканскім узброеным сілам складана змяніць напрамак свайго развіцця, бо ў іх уваходзіць вялізная колькасць людзей, што выбудавалі пэўныя сістэмы і спосабы вядзення спраў. Прыхільнікам перамен і інаватарам вельмі складана працаваць у такім асяроддзі.

Войска ЗША не стае спецыялістаў, якія працавалі б над гэтымі інавацыямі - Мінабароны банальна не можа канкураваць з заробкамі, якія прапануюць тэхналагічныя кампаніі. Праз гэта распрацоўка праграмнага забеспячэння стала найважнейшай стратэгічнай праблемай узброеных сіл ЗША.

Цяпер незразумела, колькі праграмістаў і спецыялістаў па апрацоўцы і аналізу звестак насамрэч трэба Міністэрству абароны, а якую працу яно можа перадаць на аўтсорсінг. Аналіз вакансій паказаў пэўны зрух - напрыклад, колькасць згадак навыкаў распрацоўкі праграмнага забеспячэння або апрацоўкі звестак вырасла на 91% у параўнанні з 2017 годам.

Акрамя збору і аналізу разведзвестак і распрацоўкі новага ўзбраення, ШІ і іншыя тэхналогіі могуць дапамагчы войску ў кіраванні лагістыкай, прадказваць тэрмін службы пэўнага абсталявання, а таксама палепшыць догляд за ветэранамі.