У вызваленых сёлах Харкаўскай вобласці пасля расейцаў засталіся згарэлыя танкі і гелікоптэры
1- 8.05.2022, 20:16
- 11,578
Фотафакт.
Украінскія праваахоўнікі знайшлі рэшткі знішчанай расейскай баявой тэхнікі ў вызваленых Узброенымі сіламі Украіны сёлах Харкаўскай вобласці, піша «Новое время».
Фота з Малой Рагані, Бісквітнага і Альхоўкі апублікавала прэс-служба Харкаўскай абласной пракуратуры ў нядзелю, 8 траўня.
У ведамстве паведамілі, што населеныя пункты Харкаўскага раёна наведала група праваахоўнікаў на чале з пракурорам вобласці Аляксандрам Фільчаковым для дакументавання доказаў вайсковых злачынстваў расейцаў.
У далейшым будуць назначаны экспэртызы з мэтай атрымання звестак пра тыпы ўзбраення і боепрыпасаў, якія прымяняў вораг, пазіцыі, з якіх вёўся артылерыйскі агонь, а таксама падліку нанесеных расейцамі страт у выніку гэтых абстрэлаў.
У вызваленых сёлах разам з пракурорамі працавала следча-аператыўная група Службы бяспекі Украіны, экспэрты-выбухатэхнікі Нацыянальнай паліцыі і Навукова-даследчага экспэртна-крыміналістычнага цэнтра МУС Украіны.
Байцы 92-й АМБр УСУ і добраахвотнікі выбілі расейцаў з сяла Малая Рагань 25 сакавіка, а 27 сакавіка - вызвалілі Альхоўку і Гусараўку. Пры вызваленні Малой Рагані загінуў камандзір добраахвотніцкага фармавання Фрайкор Георгій Тарасенка. Прэзідэнт Украіны Уладзімір Зяленскі прысвоіў Георгію Тарасенку званне Героя Украіны пасмяротна.