Мінабароны РФ выдала здымкі з вучэбнай часткі ў Белгарадзе за кадры з поля бою ва Украіне

Відэа знятае за 25 хвілін перасоўвання на транспарце ад цэнтра горада.

Міністэрства абароны РФ 12 траўня апублікавала ў Telegram прапагандысцкі ролік пра працу рамонтных падраздзяленняў «падчас «адмысловай ваеннай аперацыі», але забылася выдаліць дадатковыя звесткі з файла. Гэта заўважыла расейскае выданне "Настоящее время".

У роліку пад музыку каліфарнійскага кампазітара Кевіна Рыкса браняваная эвакуацыйная машына з трыкалорам буксіруе па бездаражы танк з літарай Z, пасля проста ў полі пары два вайскоўцы з замазанымі тварамі мяняюць на ім рухавік.

«Прыязджаем на поле бою, забіраем пашкоджаную, зламаную тэхніку. У розных выпадках даводзілася выцягваць проста з поля бою, пад абстрэлам», - каментуе ананімны расейскі вайсковец у касцы і ў балаклаве.

Аднак відэа знята не ва Украіне, а ў 357-м навучальным цэнтры вайсковых-касмічных сіл РФ, размешчаным на захадзе Белгарада, за 25 хвілін перасоўвання на транспарце ад цэнтра горада. Пра гэта сведчаць метазвесткі файла, што паказваюць дакладныя геаграфічныя каардынаты месца здымкаў.

Журналісты таксама прааналізавалі непасрэдна відэа і высветлілі, што буксіроўка «пашкоджанага» танка адбываецца ў раёне вучэбнай часткі і найбліжэйшага садовага таварыства «Фазэнда», дамы якога таксама бачныя на кадрах расейскага вайсковай установы.

Выданне праверыла некалькі дзясяткаў іншых ролікаў у Telegram мінабароны РФ. У большасці з іх адсутнічаюць звесткі геалакацыі. А ў некаторых яны ўсё ж засталіся і пазначаныя каардынатамі ва Украіне.

Напрыклад, адзначае «Настоящее время», гэты ролік, прысвечаны «баявой дзейнасці разлікаў рэактыўных сістэм «Град», мяркуючы па метазвестак, быў зняты ў Харкаўскай вобласці і знаходзіўся ў тэчцы з характэрнай назвай «7_05_2022 фосфарныя боепрыпасы».