Лаяльны да беларускіх уладаў банк ацаніў травеньскае зніжэнне ВУП на 8,8%.

Эканоміка рэжыму церпіць страты.

Аналітыкі ЕАБР, якія даволі лаяльна ставяцца да беларускіх уладаў, ацанілі травеньскае зніжэнне ВУП на 8,8%.

Нагадаем, Белстат афіцыйна не публікуе штомесячныя звесткі пра валавы ўнутраны прадукт. Статыстыка даецца нарастальным вынікам. Паводле звестак Белстата, ВУП у цяперашніх коштах студзеня-траўня склаў 70,6 млрд рублёў. Ён скараціўся на 3,4% у параўнанні са студзенем-траўнем 2021 года. У студзені-красавіку скарачэнне ВУП складала 2,1%.

ЕАБР таксама ацаніў травеньскую дынаміку асобных галінаў. Паводле інфармацыі банка, вытворчасць у апрацоўчай прамысловасці скарацілася ў траўні на 11,8% у параўнанні з аналагічным перыядам летась, абарот аптовага гандлю – на 25,4%, грузаабарот транспарту – на 33,6%, а інвестыцыі – на 25%.

«Падтрымаў ВУП у траўні рост IT-сектару, што прадаўжаецца. Часоваму змякчэнню эканамічнага спаду таксама спрыяла нарошчванне складскіх запасаў. У найбліжэйшыя месяцы эканамічная актыўнасць можа прадоўжыць скарачацца з прычыны паслаблення спажывецкага і інвестыцыйнага попыту, а таксама змяншэння экспартных паставак», – гаворыцца ў аглядзе ЕАБР.

Еўразійскі банк развіцця захоўвае базавы прагноз ВУП Беларусі на 2022 год: ён скароціцца на 6,5 адсотка.