Сігнал ад NATO, які здольны спыніць Пуціна
7- 13.08.2022, 15:00
- 20,086
Нямецкі эксперт назваў умову «ўтаймавання» Крамля.
Прадухіліць новыя войны, развязаныя прэзідэнтам Расеі Уладзімірам Пуціным, можа сігнал, што «NATO не будзе сядзець склаўшы рукі, калі парушаюцца межы і забіваюць людзей». У гэтым упэўнены нямецкі гісторык, прафесар Генрых Аўгуст Вінклер.
У інтэрв'ю Bild ён прызнаўся, што яшчэ год таму не ўяўляў, што поўнамаштабная вайна РФ супраць Украіны магчымая. Эксперт нагадаў, што ў 1990 годзе прэзідэнт СССР Міхаіл Гарбачоў падпісаў Парыжскую хартыю.
«Гэты дакумент павінен стварыць вольны свет ад Ванкувера да Уладзівастока – поўны суверэнітэт дзяржаваў, недатыкальнасць нацыянальнай тэрыторыі, свабодны выбар альянсу. Самае позняе да 2014-га, з анэксіяй Крыма і вайной на Данбасе, стала ясна, што Расея поўная намеру выйсці з Парыжскай хартыі», – растлумачыў Вінклер.
Паводле ягоных словаў, немцы былі схільныя «заплюшчваць вочы на тое, што адбылося з 2014 года». «Гістарычная памылка!» – заявіў прафесар.
Вялікая вайна на тэрыторыі ЕЗ магла б адбыцца, калі б РФ атакавала дзяржаву-чальца NATO, напрыклад Літву, сказаў ён.
«Вось чаму так важна, каб Захад і Нямеччына прадаўжалі масавана падтрымліваць Украіну ў яе абароне ад расейскіх акупантаў», – падкрэсліў Вінклер.
Ён дадаў, што Пуцін прадаўжае сваю агрэсіўную палітыку тады, калі думае, што яму няма чаго баяцца.
«Наш сігнал павінен быць такім: NATO не будзе сядзець склаўшы рукі, калі парушаюцца межы і забіваюць людзей! І той, хто нападае на адну краіну NATO, запускае справу пра хаўрус усяго Паўночнаатлантычнага Альянсу. Толькі так мы можам трымаць Пуціна ў цуглях», – падсумаваў гісторык.