У Крыме раздаюцца магутныя выбухі: пад Джанкоем гарыць расейская вайсковая частка

Паведамляецца аб патраплянні УСУ ў склад боепрыпасаў ворага.

Раніцай 16 жніўня ў Джанкойскім раёне акупаванага Крыма прагрымелі магутныя выбухі. Аб гэтым паведамляюць мясцовыя Telegram-каналы.

Са звестак відавочцаў, былі чуваць гучныя выбухі. На відэа патрапілі слупы чорнага дыму.

«Крымінформ» піша, што выбухі адбыліся ў раёне сяла Майскае недалёка ад Джанкоя. Мясцовыя жыхары выкладваюць відэа пажару на тэрыторыі трансфарматарнай падстанцыі.

Кіраўнік Меджліса крымска-татарскага народа Рэфат Чубараў напісаў у Facebook, што на тэрыторыі часова акупаванага Крыма гарыць расейская вайсковая частка.

«Паведамляюць з часова акупаванага Крыма: удалае патраплянне па вайсковай частцы оркаў у пасёлку Qalay (цяпер Азоўскае) Джанкойскага раёна. Выбухі раздаюцца цягам гадзіны», - напісаў Чубараў.

Ён дадаў, што трапілі ў сховішча з боепрыпасамі, «гукі ад выбухаў далёка пракатваюцца па стэпе».

«Гаўляйтэр акупаванага Крыма Аксёнаў тэрмінова адправіўся ў сяло Майскае Джанкойскага раёна. Вёска Майскае знаходзіцца на адлегласці 1 кіламетр ад пасёлка Qalay/Азоўскае», - дадаў Рэфат Чубараў.

Адзначым, што афіцыйнай інфармацыі аб сітуацыі пакуль няма.