У Беларусі ІП і самазанятыя не змогуць атрымліваць назапашвальную пенсію

Таксама яе не змогуць атрымліваць інваліды І і ІІ групы.

Аб назапашвальных пенсіях і новай дзяржаўнай праграме аб добраахвотным страхаванні рэсурсу 1prof.by распавяла Анжэла Забаронак, начальніца ўправы арганізацыі продажаў дзяржаўнага прадпрыемства «Стравіта».

Нагадаем, што з 1 кастрычніка ў Беларусі ўводзіцца добраахвотнае страхаванне дадатковай назапашвальнай пенсіі. А ажыццяўляць страхаванне назапашвальных пенсій будзе дзяржаўнае прадпрыемства «Стравіта». Праграма разлічаная на дзяржаўнае суфінансаванне накапленняў пенсіянераў, паколькі частку ўзносаў на назапашвальную пенсію будуць аплачваць з бюджэту.

Аднак прадстаўніца «Стравіты» ўдакладніла, што ёсць катэгорыі беларусаў, якія не могуць разлічваць на гэтую праграму.

- Праграмай не змогуць скарыстацца індывідуальныя прадпрымальнікі і самазанятыя, а таксама інваліды I і II групы, - заўважыла Анжэла Забаронак.

А хто ў Беларусі можа ўдзельнічаць у праграме добраахвотнага страхавання і атрымліваць дадатковую назапашвальную пенсію?

Па-першае, неабходна недзе афіцыйна працаваць. Гэта значыць, асноўнае патрабаванне, якое выстаўляецца да грамадзян, каб ішла абавязковая выплата за іх страхавых унёскаў на пенсійнае страхаванне ў ФСАН.

Па-другое, важны ўзрост. Да пенсіі на дату ўкладання дамовы ўдзельніку праграмы павінна заставацца 3 і больш за тры гады.

Такім чынам, на назапашвальныя пенсіі ў Беларусі могуць разлічваць працоўныя беларусы, а таксама іншаземцы, якія маюць у краіне працоўныя ці іншыя грамадзянска-прававыя стасункі.