У Францыі ратуюць арктычнага кіта, які заблукаў у Сене
1- 5.08.2022, 21:21
- 7,854
Відэафакт.
У Францыі эколагі спрабуюць выратаваць кіта бялуху, які забраўся далёка ад свайго арктычнага дому і павольна галадае ў Сене.
Пра гэта паведаміла агенцтва AP.
Прыродаахоўная арганізацыя Sea Shepherd France асцерагаецца, што кіта можа чакаць галодная смерць у ненатуральным для яго асяроддзі.
«Ён сапраўды вельмі худы. У яго косткі тырчаць. Я не ведаю, магчыма, ужо занадта позна», – сказала Ламія Эсэмлалі, кіраўніца групы аховы марскога асяроддзя Sea Shepherd France.
Абаронцы прыроды асцерагаюцца, што кіт можа паўтарыць лёс іншай заблукалай касаткі, якая заблукала, а потым памерла ў Сене ў траўні.
Бялуху ўпершыню ўбачылі ў рацэ ў пачатку гэтага тыдня. На кадрах з беспілотніка, знятых французскімі пажарнікамі, відаць, як кіт плаўна выгінаецца на светла-зялёных водах Сены паміж Парыжам і нармандскім горадам Руан, за дзясяткі кіламетраў ад мора.
«Гэтая жывёла даволі ўражвае, белая (і) здаецца спакойнай. Яна не здаецца напружанай, рэгулярна ўсплывае на паверхню», – сказаў афіцэр пажарнай службы Патрык Эро з нармандскага рэгіёна Эр у інтэрв'ю французскаму тэлеканалу TF1.
Але прадстаўнікі Sea Shepherd France заявілі, што кіт быў у дрэнным стане, калі ён быў заўважаны ў пятніцу. Група спрабавала надаць яму сілы, накарміўшы яго селядцом.
У акіянскіх водах бялухі ядуць мноства розных відаў рыбы, а таксама васьміногаў, кальмараў, крабаў, крэветак і іншых жывёлаў. Але рака з прэснай вадой не можа задаволіць ягонай патрэбы.
Бялухі – параўнальна невялікія прадстаўнікі сямейства кітоў, якія вырастаюць прыкладна да 4 метраў у даўжыню.
Паводле словаў Эсэмлалі, замест таго, каб спрабаваць павярнуць кіта ўніз па рацэ да мора, арганізацыя Sea Shepherd France настойвае на ягоным затрыманні, каб потым яго можна было перамясціць самалётам у арктычныя воды, адкуль ён, верагодна, прыбыў.
Яна сказала, што тэставанне ДНК можа дапамагчы вызначыць, з якіх водаў прыбыў кіт – з раёна Нарвегіі, Канады ці Расеі.
«Гэта будзе магчыма толькі ў тым выпадку, калі мы зможам яго накарміць», – дадала яна.
Бледная скура бялухаў і выпуклыя лбы робяць іх лёгка пазнавальнымі. Яны таксама вядомыя сваёй камунікабельнасцю: звычайна жывуць, палююць і мігруюць разам зграямі.
Паводле звестак Нацыянальнай службы ўраду ЗША акіяну, бялухі ўважаюцца за від, які знікае, і часта сустракаюцца на плыткаводдзі ў прыбярэжных арктычных водах. Паколькі бялухі выдаюць мноства гукаў пад вадой, іх таксама называюць «марскімі канарэйкамі».
'Lost' beluga whale monitored by rescue services in river Seine pic.twitter.com/xch1n6lFnc
— The Independent (@Independent) August 5, 2022