Двух беларусаў прысудзілі да хатняй «хіміі» за двух злоўленых вугроў

Іх абвінавацілі ў браканьерстве.

Два рыбакі са Смаргонскага раёна атрымалі судовыя тэрміны за двух злоўленых нелегальна вугроў, паведамляе мясцовы рэсурс «Нарачанская зара».

Паведамляецца, што на лаве падсудных аказаліся двое сяброў, жыхары Смаргоні і гарадскога пасёлка Свір. Вядома, што мужчыны трапіліся на браканьерстве. Увечары 16 чэрвеня яны ехалі з возера Мядзел, калі іх спынілі прыродаахоўнікі. У багажніку аўто выявіўся незаконны ўлоў і браканьерскае прыладдзе. Адных так званых калабашак (адмысловыя прынады для драпежнай лоўлі. - Рэд.) у машыне было 89 штук. Таксама знайшлі інспектары лескавую сетку і двух злоўленых вугроў агульнай вагой 1,75 кілаграма.

Нанесеная прыродзе шкода за здабытых нелегальна вугроў склала 4800 беларускіх рублёў, а кошт вугроў - 64 рублі.

Суд быў адкрытым і праходзіў у гарадскім пасёлку Свір. Двух 36-гадовых таварышаў прызналі вінаватымі і прысудзілі да абмежавання волі. Жыхара Смаргоні - да 1 года, яго напарніка - да 1,5 года абмежавання волі без накіравання ва ўстанову адкрытага тыпу. Вядома, што абодва мужчыны бралі шлюб, на ўтрыманні маюць па трое дзяцей і раней да адміністрацыйнай адказнасці не прыцягваліся. Да суда і штраф, і шкоду выплаціў жыхар Смаргоні.

Таксама ўдакладняецца, што двух далікатэсных вугроў, якіх злавілі браканьеры, давялося потым выкінуць, бо паводле вынікаў ветэрынарна-санітарнай экспертызы і прызналі недабраякаснымі і непрыдатнымі для рэалізацыі.