«Пытанне будучыні Беларусі стаіць ва ўзброеным супраціве і падрыхтоўцы паўстання»

Ідэя стала дамінуючай у асяроддзі ворагаў дыктатуры.

Тэлеграм-канал «Баста!» падзяліўся меркаваннем чытача аб неабходнасці ўзброенага супраціўлення дыктатуры ў Беларусі:

- З пачаткам вайны ва Украіне, будучыня грамадства ў Беларусі стала яшчэ больш цесна звязана з будучыняй Расейскай Федэрацыі і самой Украіны. І для многіх беларусаў стала відавочным, што звяржэнне дыктатуры немагчымае без зброі і нейкай формы гвалтоўнага супраціву. Цяпер ідэя ўзброенага супраціву стала дамінуючай у асяроддзі апанентаў дыктатуры Лукашэнкі.

І такая сітуацыя ўздымае шэраг вельмі важных пытанняў, ад якіх наўпрост залежыць будучыня беларусаў і сама магчымасць звяржэння Лукашэнкі. І адно з самых першых і крытычных пытанняў гучыць як «А дзе сфармаваць такую ўзброеную сілу, калі ўнутры Беларусі гэта зрабіць немагчыма?» І гісторыя дае дастаткова шмат прыкладаў таго, як вырашальную ролю ва ўзброенай барацьбе выканалі фармаванні, падрыхтаваныя за мяжой, а не ўнутры самой краіны. Полк Каліноўскага таму прыклад.

Магчымы сцэнар, калі Полк Каліноўскага можа сапраўды ваяваць з тымі, хто наважыцца паміраць за вусатага фюрара - наўпроставы напад Беларусі на Украіну.

Неабходна ўжо зараз рыхтавацца да гэтага, каб не апынуцца на абочыне гісторыі. Найперш гэта тычыцца беларусаў за мяжой. Далучайцеся да тых парамілітарысцкіх праектаў, што ёсць пад патранажам апазіцыі, стварайце свае разам з сябрамі і калегамі, асвойвайце вайсковую справу, тактыку. Калі вы ў Беларусі - вучыцеся па інфармацыі ў інтэрнэце, выходзьце на кантакты з такімі групамі за мяжой, каб яны дапамагалі вам з навучаннем. Негатоўнасць да самай сур'ёзнай эскалацыі ў 2020 годзе прывяла нас да паразы, і мы не павінны дапусціць гэтага ізноў. Пытанне будучыні Беларусі зараз ужо стаіць ва ўзброеным супраціве і падрыхтоўцы паўстання. Ці гатовы беларускія эмігранты ў ім удзельнічаць? Адказ на гэтае пытанне можа вырашыць і лёс Беларусі агулам.