Блінкен паехаў на Блізкі Усход

Дзяржсакратар наведае Ізраіль.

29 студзеня Дзяржаўны сакратар ЗША Энтані Блінкен прыбыў у Каір (Егіпет), адкуль пачнецца яго трохдзённы візіт на Блізкі Усход, паведамляла прэс-служба Дзярждэпа ЗША.

«Блінкен наведае Егіпет, Ізраіль і Заходні бераг (рэгіён паміж Ізраілем і Ярданіяй, які належыць да палесцінскай тэрыторыі. – Заўв.) з 29-га да 31 студзеня, каб пракансультавацца з партнёрамі па шэрагу глабальных і рэгіянальных прыярытэтаў, уключаючы ўварванне Расеі ва Украіну, Іран, ізраільска-палесцінскія дачыненні і захаванне развязання ізраільска-палесцінскага канфлікту, абарону правоў чалавека і дэмакратычных каштоўнасцяў і іншыя тэмы», – гаворыцца ў паведамленні Дзярждэпа.

30 студзеня Блінкен адправіцца ў Ізраіль. Там ён сустрэнецца з новым урадам Ізраіля, прынамсі, з прэм'ер-міністрам Бенджамінам Нэтаньяху. Яны плануюць абмеркаваць міжэтнічныя дачыненні і перамовы паміж Ізраілем і палесцінцамі, якія зайшлі ў тупік. Пасля чаго Блінкен сустрэнецца з прэзідэнтам Палесцінскай аўтаноміі Махмудам Абасам.

Агенцтва Reuters адзначыла, што яго візіт праходзіць на фоне эскалацыі стасункаў паміж ізраільцянамі і палесцінцамі. 26 студзеня сілы бяспекі Ізраіля правялі антытэрарыстычную аперацыю ў горадзе Джаніне на Заходнім беразе ракі Ярдан. Пачаліся баі, у выніку якіх загінулі, паводле звестак Jerusalem Post, сама меней дзевяць палесцінцаў.

Падчас візітаў Блінкен паўторыць заклікі ЗША «да спакою» і падкрэсліць падтрымку Вашынгтонам пастановы аб стварэнні дзвюх дзяржаў, адзначыла прэс-служба Дзярждэпа. У той жа час афіцыйныя асобы ЗША разумеюць, што доўгатэрміновыя мірныя перамовы ці наўрад магчымыя цяпер, дадала Reuters.

Таксама на парадку дня візіту будзе дапамога Украіне. Як адзначыла Reuters, Украіна прасіла Ізраіль даць ёй сістэмы для барацьбы з беспілотнікамі, але Ізраіль адмовіў.

Дапамогу Украіне з ізраільскім бокам абгаварыў таксама дарадца ў нацыянальнай бяспецы прэзідэнта ЗША Джэйк Саліван падчас свайго візіту на Блізкі Усход у сярэдзіне студзеня. Тады Нэтаньяху сказаў, што перагледзіць ізраільскую палітыку ў дачыненні да ўкраінска-расейскай вайны, але ўстрымаўся ад абяцанняў аб наўпроставых пастаўках зброі Кіеву, паведамляў Reuters.