Жыхара Ліды асудзілі за «абразу» Лукашэнкі і ўдзел у пратэстах

Прысуд вынес суддзя Уладзімір Федаровіч.

У судзе Лідскага раёна 26 студзеня асудзілі Юрыя Брэйва на падставе ч.1 арт.368 («Абраза Лукашэнкі»), ч.1 арт.342 («Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх») Крымінальнага кодэкса. Суддзя Уладзімір Федаровіч прызначыў Юрыю два гады і шэсць месяцаў пазбаўлення волі ў калоніі ва ўмовах агульнага рэжыму, паведамляюць праваабаронцы.

Судовы разбор паводле справы пачаўся 25 студзеня. Юрыя затрымалі 24 лістапада 2022 года першапачаткова за каментары ў сацыяльных сетках. Мужчына мае на ўтрыманні дзіця.

Адрас для падтрымкі палітвязня: Турма №1, 230023, г. Гародня, вул. Кірава, 1, Брэйву Юрыю Станіслававічу.