Саакашвілі пераведзены ў рэанімацыю ў крытычным стане

Пра гэтым паведамілі адвакат і блізкія экс-прэзідэнта Грузіі.

Былы прэзідэнт Грузіі Міхаіл Саакашвілі пераведзены са шпіталя «Вівамэдзі», дзе ён знаходзіўся некалькі апошніх месяцаў, у рэанімацыю. Ён знаходзіцца ў крытычным стане, напісала ў сацсетцы Facebook у аўторак, 31 студзеня, дэпутат Вярхоўнай рады Украіны Лізавета Ясько, якую звязваюць з Саакашвілі блізкія стасункі.

Пра тое, што Саакашвілі перавялі ў рэанімацыю, паколькі яго стан пагоршыўся да крытычнага, заявіў у эфіры грузінскіх тэлеканалаў Mtavari і Formula і сябра «Адзінага нацыянальнага руху» Георгій Чаладзэ. Інфармацыю аб пераводзе палітыка пацвердзіў яго адвакат Шалва Хачапурыдзэ.

Між тым у клініцы «Вівамэдзі» сцвярджаюць, што Саакашвілі па-ранейшаму знаходзіцца там. «Яго не пераводзілі, ён у палаце», - заявіла грузінскай службе «Радыё Свабода» дырэктар клінікі Ніно Надзірадзэ. Інфармацыйны партал «Навіны Грузія» са спасылкай на маці экс-прэзідэнта Гіулі Аласанію паведаміў, што раніцай у той жа дзень Саакашвілі страціў прытомнасць, у яго паднялася тэмпература.

У Грузіі супраць Міхаіла Саакашвілі распачата пяць крымінальных спраў. Ён вярнуўся ў гэтую краіну ў ноч на 29 верасня 2021 года. Са звестак следства, Саакашвілі таемна прыбыў у грузінскі порт Поці на пароме «Вільня», схаваўшыся ў грузавіку. Экс-прэзідэнт размясціў у сацсетцы Facebook відэа з заклікам да грамадзян галасаваць на выбарах 2 кастрычніка супраць кіроўнай партыі «Грузінская мара». У сваім наступным відэа Саакашвілі заклікаў грамадзян ладзіць пратэсты, прадракаючы фальсіфікацыі. Паліцыя і спецслужбы змаглі ўстанавіць месцазнаходжанне палітыка толькі 1 кастрычніка. Ён быў затрыманы ў Тбілісі ў кватэры кіроўцы трэйлера, на якім прыехаў, і ўзяты пад варту.

У кастрычніку 2021 года Міхаіл Саакашвілі, знаходзячыся ў турме, абвясціў галадоўку, якую трымаў 50 дзён і спыніў толькі пасля пераводу ў вайсковы шпіталь у Горы для рэабілітацыі. Аднак па вяртанні ў турму 21 лютага палітык зноў абвясціў галадоўку, якая доўжылася яшчэ 20 дзён. 12 траўня ў сувязі з пагаршэннем здароўя ён быў пераведзены з турмы ў прыватную клініку ў прыгарадзе Тбілісі, дзе ўтрымліваецца ў асобнай палаце пад вартай. У Тбілісі адбыліся некалькі акцый пратэсту з патрабаваннем вызвалення Міхаіл Саакашвілі.

На 1 лютага прызначанае чарговае пасяджэнне суда наконт хадайніцтва аб адтэрміноўцы пакарання і вызваленні Саакашвілі.