ЗША прызначаць спецыяльнага пасланца для Беларусі
9- 31.01.2023, 21:28
- 6,340
Спецыяльны пасланец будзе працаваць з дэмакратычным рухам нашай краіны.
Святлана Ціханоўская 31 студзеня сустрэлася з памочніцай дзяржаўнага сакратара ЗША Робін Даніган, паведамляе прэсавая служба кіраўніцы Аб'яднанага пераходнага кабінета.
Ціханоўская расказала прадстаўнікам Дзяржаўнага дэпартамента ЗША аб сітуацыі з палітычнымі зняволенымі і варунках у турмах, апошніх судах, пераследзе журналістаў і актывістаў, выказала сваю ацэнку магчымага ўдзелу войска Беларусі ў вайне супраць Украіны.
Робін Даніган праінфармавала Ціханаўскую аб тым, што ЗША прызначаць спецыяльнага пасланца для Беларусі, які будзе працаваць з дэмакратычным рухам. Даўней аб гэтым афіцыйна не паведамлялася. Акрамя таго, прадстаўнікі Дзяржаўнага дэпартамента запэўнілі беларускую старану ў далейшай адназначнай падтрымцы дэмакратычных сіл.
Стораны абмеркавалі выпрацоўку новай праактыўнай стратэгіі ў дачыненні да Беларусі, якая магла б уключаць захады для абароны незалежнасці краіны і вываду расейскіх войскаў, далейшай ізаляцыі рэжыму Лукашэнкі, а таксама падтрымку дэмакратычных перамен. Ішла размова аб магчымасцях правядзення міжурадавай сустрэчы краін, якія падтрымліваюць беларускую апазіцыю.
Таксама Даніган і Ціханоўская абмеркавалі дзеянні для недапушчэння ўдзелу прадстаўнікоў афіцыйнага Мінска ў Радзе Бяспекі ААН як часовага чальца і разам з тым удзел прадстаўнікоў дэмакратычных сіл у Генеральнай асамблеі ААН і акцыях Вялікай сямёркі.