У Гародні пакупнік заўважыў малако, якое «амаладзілі» звычайнай асадкай

Пасвяжэла на тыдзень.

У адным з дыскаўнтараў Гародні заўважылі пакет малака з выпраўленай незвычайным спосабам датай вырабу, піша Newgrodno.by.

– Я хацеў набыць малако. Узяў пакет, аўтаматычна зірнуў на дату вырабу. Яна мне здалася дзіўнай, – расказвае мужчына.

Лік 22, паводле ягоных словаў, асадкай быў выпраўлены на 28. І так было на ўсіх пакетах у скрыні.

– Я стаў здымаць на відэа. Персанал у краме абурыўся гэтым. Але скрыню забралі. Што гэта было? – абурыўся мужчына.

Паводле ягоных словаў, усё адбылося 30 лістапада. Дарэчы, тэрмін прыдатнасці малака ў такім пакаванні 8 дзён. І да гэтай даты, калі прадукт сапраўды вырабілі 22 лістапада, малако ўжо набліжалася да статусу «пратэрміноўкі». І калі дату выправілі, то такім няхітрым чынам прадукт «амаладзілі» амаль на тыдзень.

– Паводле гэтага пытання праводзім унутраную праверку. Паводле вынікаў праверкі, калі будзе вызначаная віна супрацоўнікаў крамы, яны будуць змушаныя да дысцыплінарнай адказнасці, – пракаментавалі Newgrodno.by сітуацыю прадстаўнікі гандлёвай сеткі.

Нагадаем, перад набыццём лепш уважліва вывучыць інфармацыю не толькі на цэнніку, але і на ўпакоўцы тавару. Калі ўжо набылі пратэрміноўку, то яе можна вярнуць назад у краму. А там абавязаныя вярнуць пакупніку грошы ці замяніць пратэрміноўку на аналагічны якасны прадукт.