У новы пакет санкцый ЕЗ патрапілі 12 беларускіх вайскоўцаў і чыноўнікаў
4- 18.12.2023, 21:41
- 12,722
Спіс.
У 12-ы пакет санкцыяў, які Еўразвяз увёў у дачыненні да Расеі ў сувязі з вайной супраць Украіны, увайшлі 12 беларускіх вайскоўцаў і чыноўнікаў.
У новы санкцыйны спіс ЕЗ уключаныя:
Алег Мішчанка, першы намеснік кіраўніка Дзяржаўнага ваенна-прамысловага камітэта;
Аляксандр Рахманаў, намеснік дзяржсакратара Рады бяспекі;
Аляксей Лабко, кіраўнік 230-га агульнавайсковага палігона;
Павел Муравейка, першы намеснік дзяржсакратара Рады бяспекі;
Валерый Равенка, кіраўнік Дэпартамента міжнароднага ваеннага супрацоўніцтва – памочнік міністра абароны;
Васіль Герасімаў, старшыня КДК;
Віталь Яфанаў, кіраўнік 174-га навучальнага палігона ВПС і войскаў СПА;
Леанід Давідовіч, камандзір 61-й авіябазы ў Баранавічах;
Сяргей Лагадзюк, намеснік кіраўніка Генштаба УС;
Уладзімір Чаравухін, кіраўнік гомельскай філіі «Белаэранавігацыі»;
Вячаслаў Расалай, намеснік старшыні Дзяржаўнага ваенна-прамысловага камітэта;
Аляксандр Дакучыц, кіраўнік берасцейскай філіі «Белаэранавігацыі».
Пад санкцыі таксама трапіла нараджэнка Віцебска Галіна Кацюшчанка – старшыня «выбарчай камісіі» ў акупаванай частцы Запарожскай вобласці.
Нагадаем, Еўразвяз 18 снежня зацвердзіў 12-ы пакет санкцый супраць Расеі праз вайну ва Украіне. Новыя абмежаванні набудуць моц пасля публікацыі ў афіцыйным часопісе.
Галоўным новаўвядзеннем новага пакета сталі абмежаванні супраць расейскай дыяментавай галіны: уводзіцца забарона на імпарт непрамысловых дыяментаў, здабытых, апрацаваных або вырабленых у Расеі, і абмежаванні на імпарт расейскіх дыяментаў, апрацаваных у трэціх краінах.
Абмежаванні закранулі таксама імпарт з Расеі вырабаў з жалеза, чыгуну, медзі і алюмінію. Уведзеная забарона на некаторыя хімічныя рэчывы, літыевыя батарэі, тэрмастаты і іншае.